Chief Secretary Vanhela Pachuau chuan, darkar 8 pawh mahni thutnaa tha taka thu peih lo sorkar hnathawk tan 6th Pay chu sawi rik ve tur chi a nih loh thu sawiin, sorkar sum Rs.20,000 aia tam hman dawn chuan sorkar-a hriattir ngei a tul thu a sawi.

 

Medical Reimbursement Bill chu anni aia rethei daihte pawhin an bill ve theihloh a nih thu sawiin, he an hamthatna hi dik lo taka hmang an tam thu leh, a dik tak chauh sum pek a, dik lo taka ziah saktu Doctor te chu hriatchhuah an nih chuan hrem ngei an nih tur thu a sawi bawk a ni.

 

Ningani-a I & PR Conference Hall, CHANEM?Building, Champhai-a sorkar officer 53 zet kohkhawmna-ah Chief Secretary Vanhela Pachuau chuan he thu hi sawiin, MR-a sorkar hnathawh chak pawh tam tak an awm thu leh Mizorama sorkar hnathawkte chu North East-ah hlawh sang ber leh nuam ber nia a hriat thu sawiin, ‘Sorkar hnathawk chungin politics kan khel a, kan sumdawng a, sakhuana nen kan chawhpawlh bawk a, tha vak lovin thawk mah ila inban a awm thei tak tak lo. Hetiang taka kan vanneih laia mahni inhaivur kan tum tlat thin hi i sim ang u, kan hlawh leh facility-ah hian i lungawi ang u,’ a tiin a sawi bawk.

 

Chief Secretary chuan, mipui ten hlawh sang ringawt ngaihtuah, tha taka hnathawh tum lem lova sorkar hnathawkte an hmuhna chu kalsan a hun tawh thu sawiin, officer kalkhawm-te chu mahni thuneihna (power) dik taka hmang tur leh Sorkar sum dik taka hmang turte in a chah bawk a ni.

 

Vanhela Pachuau chuan Officer-te chu an hnathawhah fimkhur tura chahin, RTI hmanga hmanga zawhna chhang tha duh lo te chu hrem theih an nih thu sawiin, sorkar-in ACB ti chakin, thuneihna sang zawk a pek thu leh police station ang maiin thil dik lo, an hnena report lut chu an chhui nghal thei tawh tih a sawi bawk.

 

Sorkar sum hmanga thil lei te, hnathawh te chu a tha tur a nih thu sawiin, department tana thil lei dawnah pawh quality tha, a daih rei ngei lei tur a nih thu a sawi bawk a, sorkar hnathawkte chu conduct rules chhiar thin turin Chief Secretary chuan a chah bawk.

 

He inkhawm hi Champhai DC Vijay Kumar Bidhuri, IAS chuan a kaihruai a ni.