Chief Minister Lal Thanhawla chuan Mizoram sorkarin thil diklo tite chu tumah a hrem dawn lova, Danin a hrem mai dawn a ni, a ti.

 

 

He thu hi Assembly Session neih mekah a department sum ruahman sawihona a khaikhawmnaah a sawi a ni a. Sorkarin dik taka thiltih a tum avangin Ethics Committee a din thu a sawi a. Diklo chu sorkar hrem ngai lovin Danin a hrem mai dawn a ni,” a ti bawk.

Corruption dona kawngah sorkarin theihtawp chhuaha hma a lak chhoh mek thu pawh CM hian a sawi a. Anti Corruption Bureau Director atan CBI-a kum 5 lai tawnhriat lo nei tawh IGP dah a nih thu tarlangin, Home Minister hmalaknain thawktute pawhin training an neih theih dan tur ruahman mek a nih thu a a sawi a. “CBI pawh a tul huna koh theih mai turin kawngkapuiah kan dah,” a ti.

Mizote khawtlang nun, hnam leh kohhran nun tichhe nasa ber nia hriat chu corruption a nih thu sawiin, “Mizoramah mi state ngaihtuahin a hluar tehchiam lo a ni maithei a, mahse, Mizoram standard-ah chuan a hluar hle a, hei hi theihpatawpa do kan tum a, tawngtaipui pawh kan ngai hle a ni,” a ti.

Corruption duh lo pawl an lo pung chu lawmawm a tih thu sawiin CM chuan, Serkhan leh Bagha inkar kawng atan sum tamtak chingpen awm nia sawi chungchang chu a hriat ve lem loh thu a sawi a. FIR thehluh tum awm ni-a a hriat thu leh, lawmawm a tih thu sawiin, “Keini’n kan tih chuan phuba lak tum an ti ang,” a ti a. Heti chung hian Commission of Inquiry Act hnuaiah Inquiry Committee/ Commission din a nih tho tur thu House a hrilh a ni.

Congress sorkar loh laia Mizoram House velah a nupui fanau te nen thlenna an lo hnawng tawh thin thu hnukulh teuh chungin Chief Minister hian a sawi bawk a, “Kan sorkarah chuan khatiang kha a thlen ve kan remti dawn lo,” a ti.

Tuna New Capital Complex chu ‘Capital’ tih tham a tling lo tih sawiin, ‘New Secretariat Complex’ tih chu a hming hmasa a nih thu te, Govenror chenna Raj Bhavan atana building sak chu luah tlak loh a nih avangin, helai hmun hi High Court hmun atan inbiakfel a nih tawh thu te, tuna Raj Bhavan chu a awmna ngaiah awm zelin, a hlutna (originality) tichhe chuang lova chei that tum a nih thu a sawi bawk.

PMGSY, Centrally Sponsored Scheme leh thlai chi supply chung-changte pawh sawilangin, sum siamna awlsam ang maia thlai chi etc. supply chu sorkarin kalpui a tum lo tih a sawi CM hian a sawi a. “Mamawh hunah fimkhur takin kan ti ang, tute emaw sum siamna mai mai turin kan siam dawn lo,” a ti.