Vawin Assembly sessionah khan July thla sessiona sawi hlawh tak Delhi Mizoram House Resident Commissioner, SP Singh chungchang K.Liantlinga chuan sawi chhuakin, July thla tawpa DP & AR orderin RC hi insawn tur anga a tarlan leh CM meuhin ‘Kan lo enfiah anga, a tul angin a mihring pawh kan thlak ang’ a tih chu tun thlenga sawn a la nih loh thu leh mikhual te pawhin harsatna an la tawh reng thu a sawi chhuak. 

 

Lalduhawma pawhin RC hian a thawpuite a ti mangang thin hle tih leh Mizoram sorkar ai a awhnaah pawh central sorkar atanga complaint a awm bakah Mizoram hming pawh a tichhe hle a ni tih sawiin he RC hi kan CM tan pawh mualphona thlen thei a nih avangin hum zel chi ah a ngaih loh thu a sawi. 

Hei hi chhang letin CM chuan RC hi thlak a tum thu session hmasa ah a sawi lo ni-a sawiin oppositiona an awm laia ruling sorkar lak atanga hmuhsitna a tawn nasat zia tarlangin vawi engemawzat Mizoram house atanga hnawhchhuah a tawn thu hnuk ulh teuh chungin a sawi a ni. CM chuan a thil tawn ang chu midangin tawng ve lo se a duh thu a sawi rualin Delhi RC chungchang chu lo en zui a nih tur thu leh duh angin sorkar a chetvran theih loh na-ah member te hriatthiamna a ngen.

July thla Sessiona CM-in Delhi RC chungchang a sawilanna hi 6th Assembly proceeding report phek 14/15 ah ziahlan a ni a, hetah hian “siamthat ngai zawng zawng kan siam tha anga, a mihring pawh kan thlak ang” ti-a ziahlan a ni. July 27 khan SP Singh sawnna order DP & AR chuan a tichhuak ni a sawi a ni a, hetah hian Chief Minister office-ah secretary tura tih a nih thu pawh August thla tirah chanchinbu engemawzatah tarlan a ni nghe nghe. 

Tin, order dang leh ah chuan Secretary/Commissioner (Health) ah awm tur ni ang leh a hlawhlakna tur pawh SAD tih a ni. Tunah hian GAD hnuaia awm, Mizoram House hnuaia hlawh la tur a nih laiin SAD ah hlawh a la a ni. SP Singh hi tun thlenga sawn a nih loh bakah officer chinchang hria te chuan duhsakna uchuak pek ni angin an sawi. Delhi-a post chelh chungin Mizoramah post dang pek a ni a, heti hian Mizorama awm tho angin house rent allowance te la rengin chhiah chawi lamah hamthatna a tel a, central hnuaia a quarter a hren theih phah bakah Mizoram pawnah a office si avangin Mizoram sorkar atangin DA a la reng bawk a ni an ti. Media, NGO leh party ten SP Singh chungchang hi an lo au pui tawh a ni.