Kumin January thlaa Saron leh Tuithiang Veng inrina lai vela khawsa Lalhmingpuia, mi kut tuara thi ni ngeia rin chu Police ten a thih dan an chhuina kal zelah tunhnai khan hmun dang daiha tualthah thubuai vanga Central Jail-a tang mek pakhat chu Lalhmingpuia thattu a nih thu Police te hnenah a inpuang nia hriat a ni.

 

 Thudawnna sawi danin, Lalhmingpuia (tuna Peace Accord MNF Returnees Association president ni mek B.Zorampara unaupa) ruang hmuh a nih hian a lu-ah sahna hnuhma te awma hriat a ni a. He thihna chungchangah hian midang inrawlh awm ngeia rinna a awm avangin Police te pawhin thubuai ziaklutin an chhui zui nghal a ni.

 Hmingpuia thih dan chhui a nih mek lai hian Luangmual-ah hnamdang, PHE department hnuaia thawk ruang chhar a ni leh a. He thil thlengah hian rinhlelh thu-ah Joseph Thanga s/o Sikor Maroy inti chu Police ten manin thla khat leh a chanve vel Central Jail-ah a tang tawh a ni.

 Heng thihna thleng hi Police te chuan uluk tak leh ngawrh takin an chhuizui reng a. Luangmual lama hnamdang pakhat thih dan leh Lalhmingpuia thih dan chungchang hian inanna engemawchenah a neih avangin Joseph Thanga inti hi Hmingpuia thattu a ni thei em tih rinhlelhna a awm chho ta a.

 Police te chuan Central Jail-a tang mek Joseph Thanga chu la chhuakin an dawp a, Police te hnenah hian Hmingpuia thattu a nih thu hi Joseph Thanga hian a puang ta niin thudawnna chuan a sawi.

 Joseph Thanga hi Bihar lam mi, Lawngtlai district-a Mualbuk khuaa khawsa thin nia insawi a ni a. Police ten an man lai pawhin khawsakna (address) mumal a nei lem lo, vak rawlai mai mai thin ni-a hriat a ni.