Hun ralti leh muanawm loh takah kan cheng tawh a, a bik takin hmeichhe tan phei chuan pâwn chu sawi loh mahni in chhung khur ngeiah pawh hlauhawm a thleng thei reng tih hria a tha. ‘ I fanu-in pawngsual tumna emaw tawk ta se, a inveng thei chiah ang em?’ tih hi Nu te ngaihtuah atan a tha hle mai a, a hnuaiah hian invenna pawimawh tak tak tarlan a ni a, zawm ngei a tha hle mai.

 

Mahni invenna:
Sap ram mai a ni tawh lova, India ram khawpui lian tak takah chuan 'self-defence class' hi a lar hle a, mahni invenna tawk thiam turin hmeichhe tam takin tunlai hian class an la tluk tluk tawh a ni.
Mahnia inveng thei hmeichhia an tlem em em laiin hmeichhe laka pawikhawihna leh suahsual rawngbawlna erawh a pung tial tial si. I fanu kha Karate champion a nih kher a ngai lova, mahse mahni invenna tawk erawh a thiam a tha hle ang. An mahni khawihtumte hi in 'fit' tak tak an ni ngai meuh lova, chutih rualin 'hmeichhiate chu âwm nem zawk leh chak lo zawk' nia ngaihna rilru an neih tlat avangin an zuam em em ringawt thin.
Chuvang chuan, mipa sahuat lai leh engemaw chet dan tlemte tal a hriat ngei ngei a ngai a ni.

Pepper Spray:
Khawpui lian tak taka cheng hmeichhe tam zawkte hian an bag-ah pepper spray an pai deuh vek a. Hengte hi a tangkaiin misualte hnawk kiangtu tangkai ber a ni hial a.
A hmaiah emaw a taksa khawimaw lai takah emaw spray a nih chuan kha misual kha a talbuai ngei ngei dawn a, hemi chhung hian inthiarfihlim theih a nih avangin khawi ilo kalnaahte hian ken a him hle.

Cell phone:
Hei hi nu leh pa tam takin fa te tihkhawlohnan an hman tir mek laiin thenkhat chuan tangkai takin an hmang thung a. Cell phone a neih chuan a awmna chin a hriat theih a, chhui zui zel pawh a awlsam bawk a, chutih laiin dawt an sawi lohna tur leh thu dik chauh an sawi theihna tur atana an tet te atanga zirtirna tha tak i pek erawh a ngai ngei ang.
Tin, number pawimawh tak tak- Police, Emergency, Hospital etc. te hi contact list-ah hian dah turin hrilh thin la, engemaw rikrum thil leh hlauhawm angahte tanpuina a hmuh theihna tur atan a pawimawh.

Chhia leh tha hriatna:
Hei hi tam tak chuan an hai der lui thin. Engemaw thil lo thleng tur ang chi hi rilru hian a lo hre lawk emaw a tinzawn thei a. Mahse, 'a ho mai mai' tih thinna hian buaina a rawn hnuk lut fo.
Mipa nghal deuh leh 'over' deuhte hi chu huaisen taka hmachhawn mai a tha, rum deuha han melh emaw ankhum hrep a sual lova, a rang a ranga kalbo san nghal tur a ni.

Kawngka pui:
Hmelhriat loh kawng lo hawn sak ngawt hi a him ber lo. Mizote hi hetiang kawngah hian kan zau viau lawi a, mahse che sual zeuh zeuh sawi tur an awm tawh. Mikhual chunga ngilneih chhuah hi a that viau laiin tunge an nih tih hriat si loh sawm lut mai te hi tihsual palh a hlauhawm a, mahni chauha IN a awm phei chuan a tih chi loh.

Party:
Masi hman dan tur lo hisap hi a tam zawk kan nih rual rualin he hunah hian a tam zawk bawk hi kan che chhe leh ngei dawn niin a lang. Tlaivar leh Ar kan tihte hi hunpui hmanna atan tihchi tak a nih laiin ruihtheih thil a tel nge nge thin a.
Fimkhur a ngai, loh theih lova kal a ngai a nih paw’n hma taka haw a, chhungte nena mahni In lum ngeia hman hi inchhirna thlen lo tu ber a ni a, tifuh ber berte an ni bawk.