India leh Bangladesh inkar ramri hung (border fencing) hna National Policy kal mekah chuan Chakma Autonomous District Council (CADC) huam chhunga compensation sum chu a dawng tur dik tak ten an dawn loh laiin, CADC sorkar lai hotute leh an vua leh vangten kut tling lova awlsam taka sum lakluhna atana hmang mekah puh an ni a. Chakma Council-a MDC leh MNF president ni mek Rasik Mohan Chakma chuan he sum chingpen chungchang hi sorkar hriatpuia dan bawhchhiatna lian tak (Govt. Sponsor Crime) a tling hialin kan hria,” a ti.

 

 

He Indo-Bangla Border (IBB) ramri hung hna thawh mek chu India tana thil tha leh sorkar laipui policy a nih avanga an dodal loh rualin, compensation pek danah erawh an lungawiloh thu nimina Aizawl Press Club-a thuthar lakhawmtute an kawmnaah RM Chakma hian a sawi a. Sum tamtak a dawng tur ni lo ten LSC lem leh midang LSC hmangin CADC sorkar hotute vua leh vang chuan a hlawkna an lo tel ve niin kan hria, a ti.

Chakma District Council MNF president chuan IBB Fencing hna kalpui mek Phase-I atangin CADC huamchhung atan compensation sum Rs.9,65,57,170/- sanction a nih tawh thu a sawi a. LSC lem hmanga compensation lo la zingah hian CADC sorkar laia hotute Chairman, Dy.Chairman, EM vua leh vang thahnem tak an tel thu sawiin, tuna ruling MLA ni mek NP Chakma chu thuk taka inrawlhna neia an hriat thu leh, a chhungte engemawzat chu dik lo taka compensation latu zingah hian te ve ngeia an hriat thu a sawi.

Ramri hung hna thawh a nih dawn hian compensation pekna tura ram enfel (assessment) tih dawnah District Council-ah huan/ram pass (LSC) thehluh vek a ni a, LSC atang hian Xerox copy siama compensation an hmuh theihna tura thilti-ah CADC sorkar hotute an puh.

Hetiang a nih lai hian pass dik tak nei mi 87 te chuan compensation pek an la nih lo thu leh, heng mite hnenah hian a rang lama compensation pek an phut thu RM Chakma chuan a sawi a. “Mizoram sorkar hian corruption a zung chawpa pawt phawia phoro an tum avangin he thil diklo-ah hian action la turin phut ngai kan ti lo a, ACB-ah FIR thehluh pawh kan tum lem lo, anmahni intiamna anga ti mai turah kan ngai,” tiin a sawi.

Border fencing chungchanga compensation pek dan felhlel tak hi a awm zel loh nan te, a hmu tur dik tak, a tuartu dik tak ten an hmuh ngei theih nan hma laksak tura ngenna hi Zirtawpni khan Mizoram Governor hnenah an thehlut tih CADC MNF hruaitute chuan an sawi a. “Ramri hung avang hian mi sang tel te chu an chenna hmun sawn a ngaih avangin an mangang em em a, khawtlang nun leh eizawnna thilah harsatna nasa tak tawk mekin, CADC-a sorkarna chelhtu thil tithei ten pass lem hmangin awlsam taka sum hmuh theihna remchang atan an hmang a ni,” an ti bawk.

Ramri hungin a sut chhiat tur, fencing hna atan hian Parva khua thlengin kawng laih a ni tawh a, hei bakah hian sut chhiat tur tamtak ala awm avangin, District Bawrhsap kaihhruaina hnuaiah dik taka thiltih a nih theih nan sorkar, tlawmngai pawl, political party leh hnathawktute aiawh telna District Level Committee din an phut thu te, hemi chungchang hi Governor hnenah pawh an thlen thu CADC MNF hotute chuan an sawi bawk a ni.

RM Chakma hi AB Chakma, Ex-MLA bakah CADC-a MNF hruaitute bakah MNF Gen.Hqrs. atangin hruaitu thenkhatin an tawiawm a ni.

 

Chakma ADC MNF hruaituten diklo taka IBB fencing compensation lak a nih dan an tarlan te chu :-

 

Kali Kumar Tongchogya, CEM, CADC vua leh vang mi 16 ten LSC lem hmanga compensation an lak zat - Rs.52,54,300/-

NP Chakma, MLA leh Aroti Chakma, EM i/c LAD etc., CADC vua leh vang mi 10 ten LSC lem hmanga compensa tion an lak zat - Rs.30,22,800/-

Susen Chakma, Dy.Chairman, CADC vua leh vang, mi 15 ten LSC lem hmanga compensation an lak zat - Rs.35,81,900/-

Sushil Kumar Chakma, Chairman, CADC vua leh vang mi 14 ten LSC lem hmanga compensation an lak zat - Rs.41,79,250/-

Mohan Chakma, EM i/c PHE etc., CADC leh a nupui, Parva khua ten LSC lem hmanga compensation an lak zat - Rs.9,77,000/-

Budha Lila Chakma, EM i/c LRS etc., CADC vua leh vang mi 2 ten LSC lem hmanga compensation an lak zat - Rs.7,34,000/-

Midang LSC/Land Pass hmanga compensation lo latu mi 14 ten compensation an lak zat - Rs.38,91,900/-

CADC sorkar hotute vua leh vang mi 59 in LSC lem hmanga compensation an lak leh, midang LSC/Land pass hmanga compensation mi 10, an vaiin mi 69 ten diklo taka compensation an lak zat nia an sawi belhkhawm chu Rs.2,16,41, 150/- a ni.