Zawn peih phawt chuan khawiah pawh hian  tlin lohna leh dik lohna hi chu a awm vek. Nupa inkarah pawh a bang bik lova, inhnial leh inhauh te hi inpumkhatnain a chhawm tel ve tho a ni a, hnar emaw umkian ngawt theih a ni lo.

An sawi fo thin, Nupa chu lei leh hâ ang deuh hi an ni a. An awm dun a, mahse inseh fuh châng hi a awm lo thei lo. Engpawhnise, inhnial thinrim hi pumpelh tawp theih a nih loh rualin, inhnial loh dan tur kawnghmang a awm ve thova, inhnial lo tura pawhpen dante pawh a awm lo a ni miah lova, tun tumah hian kawppuite nena inhnial loh hram dan kawng hmang zir ho kan tum dawn a ni.

Puia chuan a thil tihsual palh chu tlangau pui kher ngai lovin a hre kar mai a. A nupui Te-i erawh a chungah a thinrim hle a, a pianchamphaphaka restaurant-a kalpui tura a tiam zet hnu-a a kalpui leh si lo chu pawm thiam harsa a ti ngawih ngawih. Puia pawhin a duh reng vang a ni bik lova, engemaw meeting pawimawh tak mai a neih avanga hman remchang lo a ni.

A tukah Te-i zing tho chuan a lukham bulah rose par mawi tak mai leh zungbun nalh tak mai hi a lo awm a. Mak a ti kher mai. Chutah Puia chuan duat takin a kuah vawng vawng a, boruak tha lo awm dawn nia lang chu kar lovah chhem bo a ni ta. 

A châng chuan, thil tul leh pawimawh lutuk lo nia langte pawh sawi vung a, inhnialna khur puia luh pui hi kan ching hle a, a bultan tu nih pawh kan hreh hran lo bawk.

Inrin tawnna, inzah tawnna leh dik taka tih thinna hi nupa inkar tinghettu leh a ban pui an ni. Engemaw ho te tea inhnialna hi pumpelh theih a ni lovang maw? Theih teh reng mai.

1) Hun awl inpe thiam rawh
Eng thil dik lo thleng a, enge fel lo awm tih ngaihtuah hi a pawimawh a, chumi atana hun awl neih pawh a tul hle. Engemaw thila inhnialna a lo awmin rik buan buan aiin inngaihtuahna hun neih tum ta zawk ula. Tuna inhnialna kha thu pui hla pui a nih lem loh phei chuan hun khawhralna tak tak a ni. Nangmah chauha awm a, thil awmdan ngaihtuah let a, chhui nawn leh thinte hi a tha hle a. Harsatna chinfel ngai nia i hiratte kha ziak chhuak thin ang che. Inhnialna a lo awm changa inthiar fihlim thinna hian inpahnih inkarah inrin tawnna a thlen zawk a, a boruak kha chhem dai i tum tih a lantir bawk. 

2) Sawi dun rawh u
Engtiang khawpa puitling leh tawn hriat ngah tawh pawh ni mah ula, a changa han inhnial deuh bap bap hi pumpelh theih a ni chuang lo. Dah tawh lo tura i tih hnu pawha a dahna lova i pasalin pheikhawk a dah leh thin chu In i lo haw a, i hmuh veleh khan tawpin tai nei lo tur inhnialna a hring chhuak dawn tihna a ni a. Sum leh pai chungchanga inhnialna te phei chu buaithlak deuh mai a ni a, mahse sawi ho erawh a laimu tak a ni bawk si. Pakhat a sat vur tawh chuan lo sat ve vak kha a puak chhuak ve ve tur in ni dawn tihna a ni a, chuvang chuan pakhat zawk zawkin ngawih lo chuh vata hi inchhirna titlem tu a ni. "Sawi dun teh ang, he thil hi thinrim chunga tih fel chi a ni lova" tia pahniha sawi dun tum tur.

3) Tawngkam hmang fimkhur rawh
Tunhma atanga a duh loh leh a huat zawng ang chi sawi chhuah a, hming dukdak lo zeta inkohte hi mei alha petrol leih buak ang a ni a, hlauhawm tak a ni. Nakina i la inchhir leh ngawih ngawih tura kha tun maiah khan i sawi thei. Tum reng vang pawh ni lovin i pasal rilru kha i tina hle thei a ni. I sawi loh tur pui i sawi dawn nia i hriat chuan lei i seh chat mai pawh kha a pawi lo zawk ang. i duh lo tur ang chi a nih phei chuan inngaihtuah hmasa phawt ang che.

4) Inhnial man a awm hliah hliah em?
Inhnial khan awmzia a nei em? Mi pahnih inkar boruak tichhe thei zingah hian - rinawm lohna te, inrin lohna te, inhriat thiam lohna te leh dawt in hrilh te hi pasal te nena inkar tichhe thei tu a ni a. Tuna i feeling kha i pasal hrilh la, a awmdan leh cheziaa i lawm lohna lai a awm chuan a hriat turin sawi chhuak ang che. Mahse, zaidam leh aw nem takin ni zawh rawh se. Hei hi hrereng la, inhnial buai kher ngai lova tha tak leh fel fai taka chinfel theih tur tam tak a awm tih hi!
(Chhunzawm tur)