Zirtawpni khan Mizoram People Forum (MPF) chuan Synod Conference Centre, Aizawlah General Body Meeting an nei a, MPF kalphung tur kaihhruaina leh hruaitu thar atana rawtte bakah MPF 2010-2011 budget atan Rs.7,74,00/- an pawm.

 MPF Genral Body Meeting-in MPF kalphung thar kaihhruaina siam thar pawm takah hian District Forum-in a huamchhunga hma a lakna turah point 6 belh a ni a, Constituency Forum hnuaia point 3 leh Local Forum hmalakna turah point 2 thun belh a ni a. District, Constituency leh Local Forum kalphung thar belh zingah hian an huam chhung theuha hmakakna tur - 'Ram leh hnam tana sorkar hmalakna leh mipui hmasawnna tura programme hrang hrang kalpui te, a tul dan azira enpuiin, a ngaihven ang a. A tul dan azirin 'Social Audit' a nei thin ang,' tih pawh a tel a ni.

 MPF-ah hian Kohhran hrang hrang 6 telin tlawmngai pawl 5 an tel a, tun dinhmunah Hqrs. 1, District Forum 7, Constituency Forum 30 chuang, Local Forum 450 vel a awm mek a. MPF-a tel Kohhran leh tlawmngai pawl hrang hrangte hian Budget neiin hma an la a, MPF-a tel lo Kohhran atangin mimala MPF hmalaknaa nihna pawimawh tak tak chelh an awm bawk tih General Secretary Upa Lalramthanga chuan a sawi.

 Finance report-a a lan danin kum 2008-2009 ah MPF Budget Rs.8,32,000/- niin Rs.6,41,427/- hman a ni a, kum 2009-2010 April atanga September chhungin Rs.2,57,040/- hmuh atangin Rs.2,67,893/- hman a ni a. MPF Gen. Hqrs. kum 2009-2010 Budget Estimate Rs.7,76,000/- niin 2010-2011 Budget atan Rs.7,74,000/- ruahman a ni.

 Tuna MPF Hqrs.-a tel mek Kohhrante chu : Mizoram Presbyterian Church, Catholic Church, Lairam Isua Krista Baptist Kohhran, Evangelical Church of Maraland, Evangelical Fellowship Church in India leh W.Methodist te an ni a. Tlawmngai pawl atangin Central YMA, MHIP, MUP, Central YLA (Lawngtlai) leh MTP Hqrs. (Saiha) te an tel bawk.

 MPF General Body Meeting-in MPF Hqrs. hruaitu tur rawtna chu a pawm bawk a. Chungte chu : President - Moderator, Mizoram Synod, Sr.Vice President - Executive Secretary i/c Social Front, Presbyterian Church, Vice President - MUP leh Central YMA President ve ve bakah ECM leh LIKBK Kohhrana Administrative Secertary te, General Secretary - Upa Lalramthanga (Presbyterian), Secretary - Dr.Lalbiakmawia Ngente, Jt.Secretary - B.Thangtinliana (Catholic Church), District Supdt., EFCI, Rev.Dr.Chalhnuna (W.Methodist) leh Co-ordinator, Synod Social Front; Treasurer - Nunvuli, MHIP Hqrs. leh Finance Secretary-ah General Secretary, MUP Hqrs. te an ni.

 MPF General Body Meeting hi President Rev.H.Lalchhanhima, Synod Moderator chuan kaihruaiin Upa Lalramthanga, General Secretary hnen atangin Annual Report leh Upa Sainghinga Sailo, Finance Secretary hnen atangin Finance Report ngaihthlak a ni bawk.