ACB in a chhui a, man an ni tawh a, chu chu suspend chhan tur a tling em em a, a tulin a tul a ni : sosa

PWD Engineer-in-Chief Lianchungnunga leh Assistant, B.Lalthanpuia te ‘suspend’ an nih loh chhan Chief Secretary, Vanhela Pachuau in a sawi chu chhuanlam tling lo a nih thu leh Chief Minister Lal Thanhawla’n heng mite medical certificate lo petu doctor te chungchanga a thusawi chu a umphak ngei an beisei thu SOSA chuan thuchhuah siamin an sawi.

Society for Social Action (SOSA) chuan PWD officer pahnih, August ni 17, 2012-a ACB?(Anti Corruption Bureau) in a man te, darkar 48 chhung an kawl loh vanga suspend lo anga Chief Secretary-ina sawi chu chhuanlam tling lo a nih thu sawiin, “Eirua puh an nih thuah ACB in a chhui a, man an ni tawh a, chu chu suspend-na chhan tur a tling em em a, a tulin a tul a ni. Sorkar hnathawk darkar 48 police-in an kawl chuan suspend anga ngaih tur an ni.” an ti.

Anni pahnih hi darkar 48 an kawl emaw kawl lo emaw, an thubuai avang hian suspend an ni hrim hrim tih an sawi a. Sorkar hnathawk tam tak suspend tawh te chhu darkar 48 kawl vanga suspend an vang hle nia sawiin, “Anni hi eng vangin nge suspend an la nih loh?  Mizoram sorkar hian a chhan mipui min hrilh ngei a tul a ni,” an ti bawk.

Court a\anga chhuah an nih chhan  chu medical certificate an neih vang nia sawiin, certificate-ah chuan doctor enkawl lai an ni a, mu hahdam reng tura tih an nih thu tarlan a nih laiin, heng mite hian office an kal a, hna an thawk leh mai tih an sawi a. Chief minister, Lalthanhawla'n hetianga medical certificate petute hi khin an la ngai maithei tih a sawi chu a um phak ngei an beisei thu an sawi bawk.

Engineer-in-Chief leh Assistant-te hi suspend lo a thawhtir zel an nih chuan, nakina an chungchang chhui zel nana lehkha pawi-mawhte pawh an lo tichingpen a hlau-hawm thu sawiin, hei hi sorkar hnathawkte suspend an nih fo chhan pawimawh em em pakhat a nih thu an sawi bawk.

He thubuaia man zinga mi Engineer-in-Chief hlui, Liansanga chu pension tawh a nih avanga suspend theih tawh loh a nih avangin a hming tarlang ve lo mai an nih thu an sawi a. Hemi chungchangah hian hmalak zel an tum thu SOSA chuan an thuchhuahah an tarlang bawk a ni.