Buaina tenau chhuakah mi panga-in hliam an tuar

Thenzawl-a awm tura ruahman tawh NIT (National Institute of Technology), Lengpui-a sawn-chhuah leh tum tak duhloh lantirna atan nimin khan Thenzawl mipuite chu Thenzawl Field Veng, Aizawl - Lunglei (world bank road) kawngpui lun laiah an pung-khawm a, buaina tenau chhuakin Thenzawl East VCP, Lalropuia Sailo leh midang pangate chuan hliam an tuar.

Mipui pungkhawm ten lirthei kal vel dan an tum chu thuneitu lamin remti lovin an innawr a, hetia mipui leh police innawrnaah hian police ten tiang lekin, mipui pungkhawm hi an vua a, remna siam tuma ban phar Thenzawl East VCP, Lalropuia Sailo chu police te hian a lu-ah thisen chhuak khawpin an vua a, Thenzawl Com -munity Health Centre-ah hruai niin, X-ray hnu-ah first aid pek a ni a, a hnuah chhuah leh a ni. A ni bakah hian, police kut tuar mi panga te chu Dawmdawiin-ah hruai niin, first aid pek an ni bawk.

MZP Sub-Headquaretsr huaihawta mipui pungkhawm te hian, a tir lamah chuan kawngpui hi an dang thei lova, a hnu-a pung-khawm an tam deuh hnu chuan kawngpui dangin, kawng an zawh a, pawl hrang hrang aiawh ten thu an sawi a. An kawng zawh chhung hian darkar khat leh a chanve vel kawngpuiah hian lirthei kal tlang thei lovin an tangkhang a ni.

Lungawiloh lantir naah MZP Sub-Hqrs, President, V. Laltlan-zova bakah, MZP Headquarters, Lunglei President, Eric Zomuanpuia, MZP Headquarters Serchhip hruaitute leh political party hrang hrang leh tlawmngai pawl aiawh ten thu an sawi a. Thusawitute chuan, Thenzawl-ah NIT hi dah ngei an duh thu te, Thenzawl-a sorkar hmun pawimawh sawn chhuah a ni \hin chu an duh loh thu leh, hmun pawimawh apiang Aizawl leh a chhehvel ringawta ekbeng thin an duh loh thu te, chhim lam enhrang bik nia an inhriat thu te an sawi hlawm.

Kawng zawhtute hi au rualin, NIT Thenzawl-a dah tura ngaih tawh, sawn ani leh an lungawiloh thu te, Thenzawl-a NIT dah let leh an duh thu te, VCP kuthlak tu an dem thu leh hrem an phut thu te an aupui a ni.

Mipui kawng zawh hi an \hahnem hle a, police lam pawh PTC, Thenzawl a mi leh Serchhip atang-in DSP hovin thahnem tak an duty a, buaina lian tham lutuk chhuak lovin, boruak muanawm tak hnuaiah kawng zawh hi an zo fel a ni.

Kawng zawh mai bakah hian, nimin zing dar 9 -11 inkarah khan Thenzawl khawchhunga dawr zawng zawng khar a ni a, sorkar office pawh khar vek tura ngen niin, In tinah puandum an zar a, lirthei an che chhuak lo bawk.

MZP hruaitute chuan Thenzawl Forest Division sawn chhuah tumna awm te, Thenzawl-a sorkar office-a awm tur, hnathawk awm lo tam lutuk te, tun thlenga SDO(C) Office leh quarter pawh la awm lo te, sorkar-in an khua chu a hlamchhiah lutuk nia an hriat thu te sawiin, theihtawp chhuaha hmalak chhoh zel an tum thu thu-chhuah siamin an sawi bawk a ni.

Hemi hma, July ni 25 khan Thenzawla VC te leh tlawmngai pawl hrang hrang te Joint Meeting chuan, an ram an pek chhan ber NIT an neih theih dawn tak lohvah chuan NIT hmun tura ram an pek, VC pass pawh tihfel vek tawh leh Land Lease buaipui mek tawh chu Vantlang ram tana lak let leh ngei nise, ram nei let leh tur hian a tul ang zela lungrual taka hmalak chhunzawm zel nise tiin thutlukna an lo siam tawh a ni.