Mizorama Sarva Shiksha Abhiyan (SSA) kalpui danah thil fel lo tam tak a awm niin nimina Finance Minister, H.Liansailova’n Assembly House  dawhkana a copy a dah, Comptroller and Auditor  General of India (CAG) report chuan a tarlang.

CAG report-in a tarlan dan chuan SSA Mission hi naupang kum ruk leh kum14 inkar zawng zawng sikul kal tir vek an nih theihna atana sorkar programme a nih laiin, kum engemaw chen kalpui a nih tawh hnu-ah kum 2010-2011 khan naupang  sikul kal lo hi 4,146 an la awm cheu a. Mahse, hei hi official-te chuan Tuikuk raltlan lakluh belh an nih vang leh Chakma pem lut an awm vang niin an sawi thung.

Hei bakah hian SSA sum hmanga sikula zunin siam te, sikul hungna siamte leh hna dang dang thawh dan chu a sum hman nen a inmil lo hle niin CAG report chuan a sawi a. Sikul naupang chaw-chhun siam saktu chawchhum  laknaah pawh Village  Education  Committee  duh  dan  ni lova, District Project Coordination  (DPC)-te’n an mi duh zawng an  lak maite pawh a awm niin tarlan a ni. An chawchhun atana chaw leh a hmeh an sem pawh nitin calorie 502.50 leh protein gram 11.25  a  nih  laiin  calorie  464  leh protein  gram 11 awrh chauh a nih thu a sawi.

SSA hnuaia Child Friendly Elements sum cheng nuai 130 pawh a hmanna lo turah hman a nih bakah eirukna a awm nia rinhlelh theihin thil a awm niin CAG report chuan a sawi a. He sum ruahman ang chuan sikul chhunga inthiarna leh tui herh hawna ang chi-te naupang len leh tet zawng inmil tura siamte a ni a. A sum pawh hi School Management Committee emaw Village Education Committee hnena pek  tur  a ni a. Chutihlai chuan State Project Officer SSA chuan kum 2010-11 chhung khan Aizawl dawr pahnih – Skipper Sports leh Ronnies Agencies a\angin he sum hmang hian  infiamna bungrua an  lei nghek a. He sum hman a nih dan hi a rinhlelhawm hle niin CAG report chuan a tarlang a ni.