Sports Minister, Zodintluanga chuan infiamna bungrua (sports material) leiah sorkar a fimkhur thu leh hman tlak loh supply an hlauh thu a sawi.

Session neih mekah rorel lai MLA, Lalrobiaka zawhna chhangin Sports Minister chuan, contact sports tihhma -sawn nan sorkarin kumtin promotional fund a pek thin thu leh sports material te a remchan dan anga leisak niin training-na turte ruahman mek a nih thu a sawi a. Contact sports bik tana inkhelhna /practice-na tur stadiuam ruahman tum a nih thu a sawi bawk.

Zawhbelhna chhangin Minister chuan, contact sports infiammiten an thawh hlawk dan a sawi a, SAI Complex-ah Boxing, Judo, Wrestling leh Taekwondo te tan infiamna tur hmun buatsaih a nih thu sawiin, “Lunglei-ah  pawh SAI Centre hawng a ni tawh a,  Hostel-ah pawh a thlawnin an awm mek a. LDSC Gound No.II bulah Hostel sak mek chu zawh thuai beisei a ni,” a ti bawk.

Judo leh Wrestling tan Ramhlun Sports Complex-ah practice-na tur siam anih thute, Muaythai tan an Association ramah building sak sak an nih thute, Taekwondo tan bika inkhelhna tur pawh DoNER sum hmangin Kolasib-ah ruahmanna kalpui anih thute, Wushu tan Republic YMA Hall, Taekwondo tan electric YMA Hall, Karate tan Central Hall, Venghlui hman hawh anih dan te a tarlang bawk.

A hranpain Aizawlah boxing hall a awm loh thu sawiin, Ramhlun Sports Complex a sak tum  a nih thu a sawi a. Chief Minister-in a  tiam angin District tinah Boxing ring pek vek an nih tawh thu te Sports Minister chuan a tarlang bawk.

Minister chuan sports material lei chungchangah an fimkhur dan tarlangin, Association te nen an brand leh a man te, a company an duhte enfiah vek anih hnuah Association hminga chah anih thin thu a sawi bawk.

Contact Sports a infiammiten state pawn lamah eizawnna an hmuh phah thu leh sipaiah pawh tam tak an luh thu tawh thu a tarlang bawk a ni.

MPC member Lalthansanga chuan Sports department in nasa taka hma a sawn chu lawmawm a tih thu sawiin, sports ang hian department dang pawhin hma sawn ve se, GSDP a thang awk awk a beisei thu leh Sports Minister chu fakawm a tih thu a sawi bawk a ni.