Bawngkawn Police te chuan Tuirial a Peace Process & Mega Develpment for Chin Community Development-in ‘Workshop’ an huaihawt a tel mi 16 te chu nimin zing khan manin, Foreigners Act hmangin thubuai an siam sak.

Thu dawn danin, Peace Process & Mega Develpment for Chin Community Development hian May 29, 2012 atang khan Tuirial-a Hyde-Out Resort-ah workshop an buatsaih a, a buatsaihtu zingah hian Chin Human Rights Organisation pawh an tel. He workshop-ah hian riaklutin Mizoram bakah Myanmar hmun hrang hrang - Tiddim, Halkha, Falam, Mindad leh Paletwa a\angin mi 30 zet an tel a, nimin kha a tawp ni tur a ni.

Workshop a tel zinga mi 16 te chu nimin zing khan Bawngkawn Police ten an man a, Foreigners Act (phalna nei lova India rama lut) case siam sak an ni a, nimin khan court ah hruaiin convict nghal an ni a, nizan khan an rama thawn haw turin Champhai lam pan -pui nghal an ni.

Myanmar mi an man zingah hian Burma hel (CNF) an tel leh tel loh hriat a ni lo a, police te chuan hel an nih an hriat loh thu leh foreigner ni sia seminar te ngampa taka an huaihawt vanga man an nih thu an sawi.