Education pawimawhzia kan hre tawh a, siamthat zel tumin hma pawh kan la mek zel bawk a, tun anga kan ngai pawimawh chho zel a nih chuan nakin lawkah sang takah kan la invawrh chho thei ang tih a beiseiawm hle. Elementary education chungchang tlem ziak leh teh ang.

Ideal Primary School Teacher :
Mizoramah hian primary sikul zirtirtu kan thlang/chhawr fuh lo. Pawl hniam te te zirtir atan kan lo ngai thin a, zir sang deuhten pawl sang zirtir kan tum nghal zel a, hei hi a dik lo. Ram changkangah chuan elementary sikul zirtirtute hi mi thiam leh zir sang tak tak Master’s Degree nei rual an ni hlawm an ti. Keini chu zirtirtu atan zir sang ringawt ai chuan pawl 10/12 thleng lek zir, thahnemngai taka thawkte hi an tha zawk te kan ti mai mai. Kan hre mak thei ang reng. Kan hnaa kan chian loh avangin a dikna chen a awm pawh a ni mai thei. Zir sang lo na na na chu an quality pawh a lo hniam nghe nghe a, an thil zirtir fuh loh te hi pawl sang lama lo thlaksak a har tawh thin. Hei vang hian primary skul naupang zirtirtu atan graduate lo hi chu inrawlh lo tawp se hma kan sawn a rinawm. Duhthusam chuan Master’s Degree nei ngei ni thei se.

Handwriting :
Cursive handwriting hi kan inzirtir tlangpui. Mahse mark/grade pek a nih lem loh avangin sikul hrang hrang kan inzirtir dan leh kan ngaihpawimawh dan a inchen lo khawp mai. Man fuh te kutziak a nalh a, an ziak rang thei bawk. Man fuh lo laklawh te kutziak erawh a nalh lo satliah mai ni lo-in chhiar a har em em a, zirtirtute thinrimna a thlen fo. Cursive handwriting man fuh loten lehkha an han zir chho zel a, doctor-te pawh an lo ni fo tawh. Doctor-te kutziak chhiat avanga buaina tawk kan tam tawhzia hi ! Doctor te handwriting tur rengah kan ngai nghet tlat mai zel pek a, zia lo hle mai. Handwriting hi nasa leh zuala sikul zawng zawnga kan inzirtir a ngai khawp mai. Chutih rual chuan handwriting hi art chi khat a nih ve avangin naupangin a thiam theih loh chuan zirtir lui lo ila, a thiam theih zawng tur ‘sazu-ek kutziak’ kan tih mai ‘khawl chhut’ ang handwriting hi zirtir zawk ila a tha zawkin a rinawm. Mahatma Gandhi  chuan “ Bad handwriting is a sign of imperfect education” a tih laiin khawthlang lam, ram changkang ho khuan an lo ngai pawimawh teh chiam lo niin a lang. Mahse thiamnaah chuan kan tluk lo hle !

Inclusive Education :
Rualban lote tan special education kan nei a, chumi hnu-ah integrated education kan nei leh a, tunah inclusive education kan nei leh ta. Sikul pangngaiah rualban lo kan tih mitdel, bengngawng, kebai (wheelchair leh crutch hmang) bakah rilru lama rualban lo thlengin an zir vek thei tawh tihna a ni. An luh duh phawt chuan phalsak vek tur tihna a ni tawp mai. Sorkar laipui hian uluk taka ngaihtuaha a introduce a nih avangin a tha turah ngai ta ila. Rualban lote hi an khawngaihthlak a, hetianga ruahmanna siam a ni ta hi a lawmawm hle mai. Hetia naupang pangngai ten naupang vanduai zawkte nena lehkha an zir tlan a, nitina an inhmuh fo chuan rualban lo laka an rilru puthmangte pawh a danglam theiin a rinawm. Inclusive education hi thil tha tak a nih rualin kan state bik atana harsatna awm thei thenkhat tarlang ila :

Wheelchair, crutch, hearing aids, transportation, etc., a thlawna ngaihtuahsak an ni chung paw’n sikul building tam tak te chu hetiang rualban lo te tan a him lo hle. A sikul building tha taka siamthat pawh ni teh reng se a panna step, kawng tih vel hi a la him lo thei cheu. Tin, chhiatna (disaster) thlen thulhah pawh ‘emergency classroon evacuation’ te lo ngai thut ta se an thiante leh zirtirtu ten an buaipui hman tak tak lo mai thei. Zun in leh ek in thlengin a buaithlak thei bawk. Private sikulah heng thil tulte an lo siamsak duh tak tak lo mai thei bawk. Private a ni emaw sorkar a ni emaw, heng thil tul zawng zawng awm thlap pawh ni se hetiang naupang enkawl turin zirtirtute an qualified lo nasa si a, an tlin lo mai thei bawk. Tin, rualban lo duat sual avangin buaina a awm reng thei bawk.

Zawhna awm thei ta chu ‘Special School’ah te hian hetiang rualban lo enkawl tura a bika trained mi thiamte hnuaiah zir ta se a tha ber rih ang em ? Hetiang naupang enkawl thei turin zirtirtu zawng zawng training kan pe vek thei ang em ? Sorkar hian special school din belh turin hma la zawk ta se kan thatpui zawk ang em ? Nu leh pate hian kan fate hi khawngaih lo-in hmangaih zawk ila, an nih ang anga lantir hreh lo ila, an tana tha ber tur hmunah hian kaltir mai ila, a tha zawk rih ang em ?

Teacher Training Center :
State puma quality education pe tur chuan qualified leh trained teacher chauh sikul zawng zawng (Private & Govt.) a kan chhawr a ngai. B.Ed. chin chauh trained teacher-a ngaih ni se. La nei lo zawng zawng ten neih tum vek ni se. Mizorama teacher training center kan neih te chu CTE, DIET leh IGNOU an ni deuh ber mai. A tlem a, zir duh an tam si a, academic session khata an zirtir theih a tlem bawk si a, buaithlak hle mai. Hetiang training center-te hi  hawn belh theih dan awm se. A nih loh paw’n heng training centre-te hi a bikin DIET leh CTE te hi upgrade leh tihchangtlun leh zual dan ngaihtuah ni se. DIET ah hian B.Ed te pawh regular leh correspondence course, mi 1000 velin an zir theih dan tur ngaihtuah ni se. Chutiang zelin CTE pawh tihlen leh zual dan ngaihtuah ni se. Naupang 1000 talin regular leh correspondence course an zir theih dan tur ngaihtuah ni se. IGNOU pawh seat 100 chauh ni lo-in 500 tal siamsak turin Headquarters lamah dil ni bawk se. Tin, ram changkangte angin private sikul leh sorkar sikulah pawh ‘trained/licensed teacher’ chauh chhawr ni se kan ram education hian hma a sawn chak viau ang.

chhuahchhawng duh tan source tarlan a tul ang