Vawiin chawhnu dar khat vel khan zaithiam lar pa-hnih- Mathlenga leh Mimi Lalzamliani te chuan 'sex video' siam nia an tlang than chungchangah FIR an thehlut a, police in chak taka hma lak sak an lo tiam nghal a, CID pawhin an chhui zui ve nghal dawn nia hriat a ni.

Tunlai hian a tak nge a lem tih pawh hriat loh video hi a tam hle a, Mizo mipuite pawh hian kan buaipui chho tak tak dawn niin a lang. Zaithiam video tihchhuah chungchanga lehlam leh-lama inpuhtawnna a awm mek lai hian Mimi leh Mathlenga video nia sawi chu khawi khawiah emaw hmu leh hria-a insawi an awm ve leh ta.

Hemi chungchang hi Mimi hian a hriatna a rei tawh a, mahse chaw tak khukin a khuk pui lo. A nui liam mai mai thin a, midang pawhin 'a rei anga, an sawi zui peih lovang' an tihsan mai thin bawk. Mahse, a lo rei a, a ring telh telh mai. 

Mimi chuan, "Sorkar lama mi lian leh langsar tak takte hnen atangin phone ka dawng nawlh nawlh mai a, thawhlehzan thleng khan ka la la thu tak chuang lova, mahse a ri a ri chho ta a, an sawi nasa lutuk a, message atangte'n, 'I lo va zei ve' tihte, 'In van lo che nasa ve' tihte ka dawng leh nawlh thin a, ka thinrim ka insum thei ta ngang lo a ni."

"Mahni thil tih tur pawh buaipui hman lovin thil chi hrang hrangah ka buai a, chutih laia thil dik lo leh dawt hlang hlak hmanga min rawn tibuai leh zel hi ka herthiam thei lo. Zanah ka mu thei lova, ka rilru hi a hah ngawih ngawih. Dawt pawh ni se, ka pawm zam thei lova, police te hian an chhui chhuah ngei pawh ka ring tlat a ni," tiin thinrim tak chungin a sawi.

Hetiang hi a chunga thleng a nih avangin a chhui chhuahnaah leh video siam-tu leh he music video nia sawi kawltu hi man a nih theihnan a tawp thleng rak thlen a inhuam tih a sawi bakah a tisualtu hi a ngai-dam thei ngai dawn lo niin hetiang hian a sawi zui, "Ka ngaidam lovang. Engang pawhin ngaihdam min dil mahse, ka thei lovang. A thil tih man a chawi anga, a tuhrah hi a seng tur a ni hrim hrim. Ka ngaidam dawn lo chiang khawp mai," a ti.

Mimi thinrim hi a puak chhuak lo chauh a ni ber a, nikum pawh khan hetiang lam bawkah hian dik lo taka tihmualpho a lo ni tawh bawk a, tun tumah hetiang thil a chunga a lo thleng leh ta hi enliam mai mai a tum lo khawp mai. 

"Ka nihna lo ang puia puh mualpho ka ni tawh a, hmeichhe tan hei bakah mualphona tawp hi a awm chuang lo. Kei chuan min itsik a, ka eizawnna tih-chhiat a, min tih mualpho an tumna ni-ah ka ngai hmiah. Video siamtu chhui chhuak tur hian police te hi ka ring tawk a, hremna na tak an pek ngei pawh ka ring bawk," tiin nizan khan Mimi hian Thalai Times a hrilh.