Khua a ro chho a, hnahthel ro ilo mai mai pawhin mei a man hma ta hle mai. Mi tinte kan fimkhur a ngai ta. Kan hnung lawka Saiha khawpuiin kangpui rapthlak tak an tawrh te, zokhaw lama kangmei avanga chhiatna hrang hrang thleng te leh Maubawka chhiatna thlengin  in leh a chhung bungrua kangral saltiah mai lova nunna hlu tak min laksak te han thlir kirin rilru a na a, kan tawk tawhte tan phei chuan chhiatna tawkte dinhmun tur hi kan thlir thiam pui ruak awm e. Kangmei laka  inven dan tur leh fimkhurna tur hrang hrangte sikulah te, chhung inkhawmnaah te leh pui punna thlenga awmze nei zawka kan inzirtir fo a tul ta viau niin a langng.

Kum 1989 January 31 a kan in leh kan thenawmte in pahnih a kan zawh vek tuma a hrehawmzia leh mite khawngaihna kan dawn nasat si zia te rilruah a lo thar leh a, chaw-ei-dawhkanah thleng leh fian chi hrang hrang a ther fer fur a, belthleng leh khuhhriang pawh design hrang hrang kan neih phah. Thuamhnaw phei chu kan haksen loh kan dawng, kan inah khan a-cheng  kan thahnem bawka kan in a kan hnu kha chuan kan khuaah secondhand thuamhnaw ngah ber kan ni ngei ang! Kan la te deuh bawk nen, a zahthlak chang erawh a awm thin. Thingtlangah  chuan kan tlema, thiante kawr neih ang ang kha chu kan inhriattawnsak deuh vek a nih thin kha. Thiantena an lo hak tawh thin han hak ve leh kha chu hnung lam atangin min lo insawihtheih khum ang tih te kha naupang thudawn a ni nain a hunlai kha chuan a serious ve riau a ni.

Aw le kan thupuiah lut tawh teh ang, Kangmei chhuak turin thil pathum(3) chiah a ngai a, chungte chu:

1. Thil kang tur(fuel) -  A sakhat emaw, a tuiril emaw, boruak lam chi emaw pawh a ni thei.

2. Oxygen – Nitina boruak kan thawk luh hian 21 % oxygen a pai a,16 % oxygen chin awmna boruakin kangmei a tichhuak thei.

3. Lum(Heat) – Thil reng reng hian kang turin a hu(vapour) tam tawk a pek chhuah a ngai phawt a, chumi pechhuak thei tur khawpa a lum lam chu Ignition temperature an vuah. Ignition temperature thleng thei tur chuan  pawn lam atanga lum(heat) pek a ngai thin. Entirnan, eirawngbawl nana ina kan hman gas hian kang turin temperature 410 – 580 Celcius Degree inkar vela a lum a nih phawt a ngai , mihring taksa lum lam let 12 vel laia sang a ni tihna a nih chu. Hetiang zat vela tisa thei turin gas lighter hmang emaw, nawhalh hmangin emaw kan gas chu kan tisa ta thin a ni.

A chunga kan sawi te khi an awmkim thap reng loh chuan kangmei a chhuak thei lo a ni.

Mithiamte chuan Kangmei hi chi(class) hrang hrangin an then a, a thelhna tur pawh hetiang deuh hian an tarlang:

Class  A – Thing, lehkha, kawr, rubber leh plastic ilo vel atanga kangmei chhuak. Hetiang kangmei thelh tur hi chuan tui tha chak tak(Pressurized water), foam emaw multi-purpose(ABC-rated) dry chemical extinguishers emaw a hman theih.  Carbon dioxide emaw ordinary (BC-rated) dry chemical extinguishers erawh chu hman loh tur a ni. Thil kangte kha an ignition temperature aia hniam tihvawh kha kan tum ber tur a ni, kan thelh hnuah pawh a kan nawn loh nan tuia tihhnawn tur a ni.

Class B – Tuiril kang thei emaw puak thei lam chi- Petrol, khawnvartui, rawng lam chi, rawngbawlna gas vanga kangmei chhuak. Hetiang kangmei timit tur chuan thil kang mek lak bo emaw, ignition temperature aia tihhniam emaw, kangmei bul vela oxygen tihtlem kha kan tum ber tur  a ni. Foam, carbon dioxide, (BC-rated) dry chemical, multi-purpose dry chemical leh halon extinguishers te hi hman mai theih an ni.

Class C- Electric bungrua/kaihhnawih atanga kangmei chhuak. Electric current kal thei lo hmanga thelh a ngai. Tui hman reng reng loh tur a ni. Carbon dioxide, (BC-rated) dry chemical, multi-purpose dry chemical te hi hman theih an ni.

Class D – Metal thenkhat – magnesium, titanium, potassium and sodium te avanga kangmei chhuak. A thelhna bik atana siam power fire extinguisher an hmang thin.

Hengte hi hriat atan a tha hle :

1. Kangmei chhuakin a siam boruak chhia Carbon monoxide hian rawng leh rim a nei lova, paih chhuah vat a nih loh chuan rei lote chhunga nikhaw hre lova min siama thihna thlen theitu a ni thin. Kolkata AMRI hospitala (Dec ni 9, 2011)  mi 90 chuang thi zingah pawh khan meiin a kan miah loh boruak thianghlim thawk tur tlachham a, Carbon monoxide hip luh tak avanga thi an tam hle  a nih kha.

2. Kangmei thelh dawnin tlanchhuahna tur rilru fim taka ngaihtuah hmasak a tha. Kangmei a tai darh tawh phei chuan midang puihna zawn vat a finthlak fo thin.  AMRI hospitalah pawh khan tanpuitu lo sawm vat se chuan khatiang em ema chhiatna kha an pumpelh mai thei.

3. Boruak tha hi chhuat bul hnaitea a awm thin avangin boruak thawk tur a tlem chuan chhuat hrulah kun hniama thawk lak a tha tiin an sawi thin. Puan hnawnga ka leh hnar hup chunga thawk lak hi a tha bawk.

4. Meiin kawr hak lai a man chuan mut nghala leh tawp tawpin mei a timit rang thin bawk.

5. Building chhawng sanga awm laia kangmei a chhuahin tlanchhuah nana elevator hman loh hrim hrim tur a ni. A sang lam aia a hniam lam pan a fuh deuh zel bawk.

Fimkhur ila…

1. Mei man awlsam thei chi bungrua chu a dahna mumal taka dah thin tur. Tui alh thei mahni ina lo stock avanga kangmei chhuak thelh theih loh khawp sawi tur a awm fo bawk. Electric wiring hlui tawh leh nghet lo  enfiah fo a tha. Kangmei chhuak tam tak awm chhan niin a lang.

2. Gas thuka a hrui invuah nghet leh nghet loh enfiah fo a tha bawk.

3. Meizial bung tihhlum loh paih mai mai lakah fimkhur a ngai tak meuh meuh.

4. Naupangte mei laka fimkhur tura hrilh leh zilh reng an ngai. 2010-a California rama kangmei nasa tak chhuak pawh kha mipa naupang nawhalh vanga kang niin an chhui chhuak a nih kha.

5. Tlangram chhengchhia leh bichilh taka cheng kan nih avangin fimkhur kan ngai lehzual khawp mai. Kawngka bula eirawngbawlna thuk leh kangmei chhuak awlsam thei chi chhek vak mai pawh a fuh lovin a lang. Ina kawngkapui pakhat chauh awm si, thlang lama tukverh sang tak tak awm bawk ang chiah chuan kangmei chhuah thulhah a buaithlak hle ang tih a rin theih. In sak lai atanga ruahmanna fel tak kan siam nghal a pawimawh tak meuh meuh a ni

6. Mizo te hian mahni ina inven nana Fire extinguisher dah hi kan la ching lo ang reng a, intihhmuh chi tak niin a lang.