Tunlai chanchinbu lama tawngkam lar tak rawn ni chho leh ta chu corruption a zung nena phoro tih leh corruption a zung nena phoro ngam chi a ni lo tih hi a ni. Ziaktu thenkhat chuan corruption ni Congress sawrkar hian a taka chhui chhuakin a bul nen lamin han phoro ta se chuan a ram ang pawn kan mualpho khawp ang tiin an ziak a. Chutih mek laiin kan CM lah chuan corruption a zung nena phoro tan a ni a, hma lak mek a ni a lo ti ve chhen bawk a. Kan inlungrual tlang thei meuh lo niin a lang.

Corruption zung hi khawi lai atanga rawn awm tan nge tih kan hriat loh chuan a zung nena phoro chu thil theih a ni hauh lovang! Nimahsela, kan ziaktute leh kan ram hruaitute hian corruption zung lo chhuahna bul leh a phoro tanna tur an sawiin an ziak ngai hauh si lo hi mak tak a ni. A lera thuai bun kan tum chuan a zung chu engtikahmah phoro a ni thei ngai dawn em ni ang? Corruption a zung nena phoro tih hi ngaihtuah liam puata sawi liam puat mai mai chi a ni lo, ram hnuk khawih danglam theitu lian ber a ni loh pawn a dawt tal kan tih ang chi hi a nih tlat avangin i fimkhur tlang teh ang u khai.

Tun dinhmuna corruption kan sawi len ber nia lang chu sawrkar pawisa eirukna hi ni berin a lang. Chutih rual erawh chuan corruption dang dang pawh sawi tur a tam mai. Mizote hi kan rinawm tawh lova, kan rilru a chhe em em a, mahni hma chauh kan sial tlat tawh ni ber te hian ka hre thin. Pawisa eiruk tur nei lo pawn hun tal a eiru a, sumdawngte lah chuan an sumdawnna atanga hlep tam thei ang ber an neih theihna tur a nih phawt chuan eng pawh huai takin an ti ngam mai a. Zirlai naupang tak ngial pawh scholarship-ah kan fihlim lo a nih hi ti raw u!

In satuin a theih hram chuan vantlang ram a eiru hreh lova, tuisem tak ngial pawn eiruk kan tum tlanna khawvelah Zoram hi a awm tawh a ni ber a. Mi hausa leh sawrkar hnathawk ni lo, a rethei a te hlei hlei hian asin eiruk tur zawng nasa tawh ni. Ruihhlo zuarte hlei hlei hian asin ni eiru nasa chu ni ti ru! Tu hi nge maw indem chuang thei awm le? A ram pum corrupt hian kan corrupt a nih ber tawh hi maw le! MRP aia sanga hralh tum sumdawng pawh an bang chuang lo. (Mi tha leh rilru dik kan awm hauh lo chu a ni lo ve!)

Tunhma Mizo Community (khawtlang nun) kha Plato-ten Utopia an tih, mitin intluktlanna, inhmangaih tawnna, inthurual tawnna, inngaihchan tawnna, intanpui tawnna thleng teuh ber khawtlang niin Sapte khan an lo sawi tawh thin asin! Mizo chanchin atanga a lan dan chuan rambuai hma, Mizo Union-ten Lalte paih duhna an neih atang khan rilru corruption hi kan nei tan ni hian ka hre tlat a, history ka hriat chian lutuk loh vang pawh a ni thei tho. Kha pawh kha dik tak chuan Lalte thuneihna itsik vang mai mai a nih bakah Central a Congress (vai chhe thluak) ten Mizo then darh vek an duhna avanga Union hruaitute an hmin tlat vang a ni thei.

Hetiang teh nuai kan nih tak siah chuan sawrkar tan pawh hmalak hi har tak tur a ni. Mahsela hmalak theih loh erawh chu a ni hauh lo, kan ngam leh ngam loh a zir a ni mai zawk. Corruption phoro kan tih hian a hmasa berah chuan Mizo rilru hi siam that a ngai a, chu chu ataka thil thleng theih turah tun dinhmunah kei chuan ka ngai si lo, mahse hma kan la dawn a nih rau rau si chuan a lian lian atanga kan tan mai hi a kawng awmchhun a ni e.

Sawrkar sum eirukna zawng zawng hi chinfel hmasak vek phawt a ngai a, chumi ti tur chuan tawngka a mipuite hmaa eirukna huat leh eiru hrem an nih dawn thu sawi reng mai ram hruaitu kan nei a nih chuan chu ram hruaitu chu kan paihthlak a ngai ang. He ram zimte siam tha leh tur hi chuan mahni chhungte ngei pawna min huat rawn hlau miah lova hmala ngam tur ram hruaitu kan mamawh ta a ni. Kan CM hian eiruk phoro hi a sawi ngun ta hle a, a thusawina hmun apiangah thu tha tak tak a sawi reng a, mahse a thusawi hi tuman kan awihlohna chhan chu a taka a thusawi bawhzuina, result, hremna tawk ta leh a taka hmalakna thil thleng mipuiten hmuh tur engmah kan neih loh avang a ni!

|halaite u, ka zawt a che u, i pa diklohna, i nu eirukna, i unaupa/ i unaunu hna hmuh dan diklohna hailang ngam tur hian ram i hruai ngam tak tak ang em? Politician rual te u, i nupuia chhungte contract hmuh dan leh thawh dan tenawm chhui chhuak tur te, i unaupa hnena dik lo taka i sum rawlruk puang chhuak tur te, i department hnuaia sawrkar hnathawk lian tak tak, i lal lai chauha hlautu che diklohna hailang ngam tur leh i fanu i fapa ngei pawh an diklohna hailang ngam tur hian ram i hruai ngam tak tak ang maw? Mahni tana hlawkna awm miah lo, a tul phei chuan nangmah mai bakah i chhungte tana channa hial pawh thlen huam khawpin ram hi kan hruai ngam chiah ang maw?

Tun thleng hian Pu Zoramthanga hian a ngam lova, Pu Lal Thanhawla pawh hian a ngam bawk hek lo! Anih leh tunah hian Pu Lalduhawma kutah rulkua kan zentir tawh zawk dawn em ni ang? Ani hi a huaisen em, a ngam ang em? Nge tun ang reng hian kal kan duh zawk?

|halai rual te u, heng zawng zawng ti tura hmala ngam kan awm tih erawh hai hauh suh ang che u tiin in thalaipui ngei hian ka fuih duh che u a ni. Hruaitu zuitlak in hmu a nih phawt chuan zui hreh suh ang che u. In ngaihtuahna thluak fim taka hmang tur leh he kan Zoram chhan chhuak tur hian nang leh kei lo chu tumah an awm ngam chiah ang nge ang lovang tih i chhiar tawh a, i rilru dik tak tarlang ngam tur leh huaisenna nei turin ka chah duh che u a ni.