“Modern world is the age of Science & Technology” an lo tih fo tawh angin hmasawnna chi tinreng hian mitinte min nuai a. Heng khawl thila hmasawnna chak takte hian lei mihringte min ti pumkhat a. Tunhmaa tapchhak zawla ngaihdan sawitlang thinte khan IT hmasawnna avangin mahni mut hmunah tlang hrana leng thenrual thate leh hriat ngai loh thiante nen Social network - ‘Facebook’ leh thil dang dang hmangtein kan vei zawng theuhte kan lo sawiho thei ta a. Nunphung a ti zangkhai khawp mai.

Nikum (2011) tir lam atang phei kha chuan thalai lehkhathiam rualten ram leh hnam inrelbawlna tura an hmathlir chi hrang hrang zalen taka an sawihona turin Facebook ah “Zoram Tan” ; “Zoram Thlirtu” ; “Zoram Political History Chhuizauna” etc. tih group hrang hrangte a lo awm tan a. Heng hmuna an khel tam ber chu ‘Nationalism’ chungchang hi a ni. Thil mak angreng tak chu, ram veitu leh hmangaihtu inti theuh theuh karah Nationalism hrilhfiah dan leh pawmpui duhdan a inmmillo hlawm hle mai a. Chung inmillohna kara tam zawk hauhtute chuan Nationalism tih hi “Ram leh hnam hmangaih burna” tiin a bulbul chhuia zirchiang hran lo hian an lo ralkhat ngaihsan bur nite hian a hriat a. Chung an ngaihdan tawmpui velotute chu hnama chianglo leh ram hmangaih ve tak tak lo ang hial tein an inpuh thul! A chang phei hi chuan tu emaw political propaganda satliah mai mai kan lo chaw tak khuk pui chiam chiam ni te hian a hriat rum rum thin.

Eng nge Nationalism chu ?

Nationalism awmze sawifiah tur chuan Nation awmzia hi kan hriatchian hmasak a tul a. Nation tih hi Latin tawng “natus” tih atanga lakchhuah a ni a. A awmzia ni deuh ber chu “Ngaihtuahna hmunkhat leh rilru thuhmun pu awmkhawm” a ni ber awm e. He nation khata ti luangluttu ber chu – tawng thuhmun, chhenna hmun thuhmun, sakhaw thuhmun, culture thuhmun, politics thuthlir thuhmun, history thuhmun, serh leh sang thuhmun etc. te hi a ni. Nationalism tih tawngkam pawh hi he nation tih atanga lo irhchhuak a ni.

Ziakmi tam tak chuan Nationalism tih hi ram leh hnam hmangaihna tiin an hrilhfiah mai thin a. A phena thil inthup haichhuak tum lova a kawr chauh behchhana hmang kan ang lek lek thin. Mi thiam zawk thenkhatte chuan hetia kan lo ngaih ang ngawt lo deuh hian Nationalism philosophy hi an lo fak tehchiam hlawm lova. George Orwell phei chuan, “Nationalism hi remna leh muanna ti derthawngtu ber leh ram hmasawnna daltu ber” a lo ti hial mai. He a hrilhfiahna hrang hrang atanga lang chiang em em chu nationalism hi mihring sentiment leh romantic mood atanga lo piang ni lovin mihring consciouness atanga lo piang a ni a. Nationalism awmna reng rengah chuan muanna (peace) ni lovin inthendarhna (pieces) a awm thin. Mi tam tak a nihna chhungril, a phena inthup hi ngaihtuah lovin nationalism awmzia chu ram leh hnam hmangaihna hi emaw ni tiin kan pawngpaw basa ngam ringawt thin a. Keimahni duh duh dana kan kailek thin avangin kan ram pawh a lo buai phah hial a nih kha! Nationalism hi kan ram dinhmun, kan chhenna hmun, kan social life etc. a zira danglam thei chu a ni takmeuh mai a. American writer ropui Palmer chuan, “ Hnam tinreng hian awhbehna laka zalenna sualna hmanruaa nationalism hi an hman thin avangin, nationalism hi buaina/indona hnar ber a lo ni e” tiin “Essay of Nationalism” tih thupui hmanga a paper present naah chuan a lo sawichhuak hial a.