Ram zalen ni a, kum 60 chuang lai mai Democracy inrelbawlna kan lo kalpui takah hian Election Commission of India chuan Golden Jubilee lawmnate neiin mipuite’n chanvo pawimawh tak an chelh a ni tih an hriatchian leh zual theih nan Jan 25,2011 khan a vawi khatna atan chawpchilh ang reng takin National Voters’ Day a lo buatsaih tawh a, kumin-2012 hi a vawi hnihna a lo ni ta a ni.

 

Democracy hi ram inrelbawlnaa mipuite kuta thuneihna pek tihna niin chu thuneihna chu roreltu thlan kawngah duh an thlan theihna hi a ni. Ram inrelbawlna kalphung tha ber a ngaih niin India pawhin a lo hmang ve a, a hlawhtlin/hlawhchham thuah hian mipuite’n mawhphurhna sang tak kan nei thung a ni. Ram thanglai/ hnufualah chuan mipuite’n an mawhphurhna ngaihsak loin vote thlak percentage a hniam thin a, a thlak chhun tam tak pawhin mimal hlawkna tur leh politician-te thutiam puarpawleng beiseinain, ram hnuk ngaihtuah loin vote an thlak mai mai thin a ni.

 

 

India ram, hnam hrang leh chi hrang inawmpawlh chuatna ramah hian mihring hawiher leh hmasawnna a inkhuangrual lo em em a, ziak leh chhiar thiam tehnaah pawh kan hniam hle. Kawng hrang hranga hnufumna hian Democracy meuh pawh min hlut tir pha lo fo. Hei hi politician thenkhatte’n remchangah la-in a koham zual tan phei chuan paradise a ni ringawt mai a ni. Vote thlak tlemna hmunah chuan awlsam taka inlei tlin mai theih a ni thin. Independence kan nih hnuah hian Parliamentary Election vawi-15 kan hmachhawn tawh a, hengah hian mipuite’n kan mawhphurhna kan hlen tha tawk lo hle. Vote nei chin atanga vote thlak(Voter Turned out) percentage hi a hniam thin hle a, 50-68% ah kan awm thin a,vote nei zatve chung awrhin vote kan thlak thin tihna a nih chu! Tin, vote thlak vawi khatna(First time voters) ho ah phei chuan 40% chung lam hret chauhin vote an thlak thin a, thalai vote nei thei tawh, electoral roll a inthun si lo hi 80% vel awm anga chhut a la ni cheu bawk!

 

 

Khitiang khi kan dinhmun a nih si chuan Democracy(tam zawk/berte thutlukna) hian he ramah hian a nihphung a va thelh nasa mai awm em?Voter turned out pawh a zatve vel chauh a nih chuan thlan tlin party chuan vote tla zawng zawng atanga 30-40% vel neiin(60-70% party dang insem), rorelna an chang tihna a lo ni a, mipui tam zawk kutthlakna(majority verdict) a ni lo tihna a ni mai thei dawn a ni. State dang ngaihtuahin Mizoram chu kan la ziaawm deuh hlek a, hmasawnna tur erawh kan la nei viau. Sixth Mizoram Legislative Assembly- General Election- 2008 Statistical Report tarlan angin 2008 MLA Election ah khan vote nei mi 611618 atangin 503665 in vote an thlak a,voter turned out kha 82.35% lai a tling phak a ni. UT nih hnua vote thlak that ber tum a ni. Candidate tling tate vote hmuh kha 31.82-56.73% ah awmin bial tina tlingte vote hmuh chawhrual chu 39.89% a ni. MP Election-2009 ah khan voter turned out 50.93% chauh niin, vote nei zawng zawng zatve vel chauhin vote an thlak tihna a ni a, INC khan hnehna changin 65.58% a chang a ni.

 

Hetiang teh nuai a nih si chuan Simple Majority Vote System(Vote hmu tam ber tlinna) hian India ram-party tam tak awmna(multy party system) hian Democracy nihphung min thelhtir fo mai tihna a ni em? Voter turned out a chhiat phei chuan a buk chawpa thelh an sawi ang chauh kan ni mai lo maw? Mahse, hnam hrang leh chi hrang, hmunhma leh tuizawng hrang tam tak nei awmkhawm kan nihna hi India ram tiropuitu a niin chutiang ze hrang nuai min phuarkhawm tur chuan mipuite-a zalenna zau tak chhawpchhuak a mi thuikhawm thei rorelna- Democracy-hi kan mamawh chhanna a ni bawk si a ni.

 

Democracy ram lian ber ni a, he kalphung hi kan la chhawm zel dawn a nih chuan mipuite’n kan mawhphurhna kan hriatchian a tul tak zet a, roreltu thlan kawngah kan hlutnate a taka hlen chhuah ngei kan tum fo a tul a ni. Mipui rorelna kan tih fo pawh hi inthlannaa roreltu thlan chhuah theina thuneihna- vote thlak- hi a ni a, candidate zingah duhthusam kan hmu kher lo thei! Ngaihdam theih ber tal thlan ve hi kan tih tur a niin Ram Danpui pawhin min phut a ni a, mi pangngai vote nei tlak-a ngaih kan nihna hlenchhuah ve pawh hi kan bat a ni. Abikin thalaite’n kan ngaihtuahna kan pek a tul tak zet ta. Thalaite tinzawn ran chungin Danpui siamthat vawi 61-na(1988) ah vote nei thei chin kum 21 atangin 18 ah tihhniam a ni a, ram rorelnaa ‘aw’(voice) nei lehzual tura min beiseina hi i thamral tir lul lo ang u! Enganga hna sang leh sumdawng hausa pawh i vote neih aia tam nei an awm lo a, chu i hlutna chu nangma chhia-tha hriatna thiang tak hmanga lanchhuah tir hi i mawhphurhna a ni. “Thalaite’n ram an vein ramin hma a sawn a, Ramin thalaite a vei chinah erawh ram tlukchhiat a hnai”tihte hre rengin kan nakin hun tur atan tun hunah hian inbuatsaih nachang i hria ang u. Democracy-mipui tam zawkte lalna ram nia chawi nung zel turin hlutna i nei e!