Pu Lalremliana  Pachuau in (Vanglaini dt 29.09.2011) thiam tak mai a ‘Term Khat lek CM ni ta ila chuan...’ tia a rawn ziah kha a tha riau va. Chu chu han tuihnih ve pahin duhthu han sam chhun zawm ve hi a chakawm riau a. Kan ram economy hi engtinnge kan tihhmasawn theih ang tih rilru pu ranin chhiartuten ngaihtuahna hmang turin ka rawn ngen hmasa a ni.

    Thahnemngai tak maia ram hmasawnna atan Electricity Power-a kan intodelh a pawimawhziate hriain Hydel Project siam a ngaih pawimawh chungchang te; inkal-pawhna kawng tha neih pawimawh-zia sawiin Zoramin kawng tha zawk kan neih theihna nan lungchang tha zawk Shillong atanga lakluh hialte tulin a hria a; ei leh bara intodelh theihna turin Agriculture tihphuisui a, Agriculture a mi thiam scientist-te hial chawkluh a inhuam a; marketing system mumal awm lo chu siamthat theih niin a ngai bawk a; Tourism Industry tihphuisui pawh a tum nangiang mai. Chumai chu la duhtawk lovin Aizawl khawpui chhungah Rope way kaltir sungte a suangtuah tel bawk a. A suangtuah-na hi a ropui em avangin kan sawi kim vek seng lovang a. Heng a suangtuahna te hi a that em avangin CM chu han ni ve na ila engtinnge ka tihpuitlin theih ang tiin ka inngaih-tuah rauh rauh a.

    Ka ngaihtuahnaa rawn lang hmasa berah chuan hetiang thil tha leh manto hi chu Mizoram atanga kan sum lakluh hi chuan engtikawng mahin kan puitlin dawn lova. Central Sawrkar hian hetiang project tihpuitlinna tur hi min rawn pe dawn ta pawh nise, Mizoram atanga kan sum hmuh ngawt atang hi chuan State matching share (10% emaw 25%) pawh hi hnawhkhah a harsa bawk si. Sawrkarin Mizoram State sumbawma lut ve tur chhiah tlem azawng lakna tur an siamthat deuh pawhin kan phun nuaih nuaih a. Mizoram Finance Minister zahawm takin 2011-12 Budget Speech-ah khan Stamp Duty lak dan tur rawn duangchhuakin Gazetted Officer hnen atangin Bill pakhat zelah Rs.10 leh Non-Gazetted-te hnen atangin Rs.5 lak a tum thu a sawi tel a. ‘Sawrkar hnathawk hnen atangin chhiah min la hnem lutuk...’ tia phun thawm hriat tur an awm nual mai a. India rama State tam zawkin an hman mek tawh motor registration tihruala Road Tax kum 15 chhung pek an han tan pawh kan sawisel nasa hle a ni. Kan ram a la changkang ve lova, a la hun lo kan ti a. Eng-tikah tak chuan changkangin hmasawn ve tak tak ang i maw? Mi thawhchhuahsa leh mi tax pekkhawm ringawta kan innghah chhung chuan changkan tak tak hi a va har duh awm ve aw tih hi ngaihtuahnaah a awm rauh rauh mai a.
    A nihna takah chuan Mizoram Sawrkara thawkte tluka nuamsa hi an awm dawn em ni aw tih hi ngaihtuah tham tak a ni awm e. Hmunpui zawka hnathawkte, hlawh tam deuh ho hi chuan Income Tax an pe vek a. Hlawh (Taxable Income) atangin 20% emaw, 30% emaw an hlawh tam dan azirin pek a ngai a, chumai bakah Surcharge leh Education Cess te a la awm bawk a. Entirnan: Sawrkar hnathawk Rs.50000/- thlatin hlawh chuan a lo berah Income Tax hi 30% + Surcharge + Cess a ngai a, thlatin cheng sing chuang a pek ziah a ngai dawn a, sawrkar atanga hlawh la tan phei chuan han pumpelh ngaihna a awm der bawk si lo. Chutiang thil ngaihtuah hi chuan Professional Tax tlem te pek bak hi chu sawrkarah engmah chhunluh a awm si lova. Stamp Duty tlem lak pawh hi an ti tlem mah mah a ni ti awm zawk tak kan ni lo maw?

    India ram hmun dangah chuan Stamp Duty leh Document Registration hi an sum hnar pakhat a ni a. Tamil Nadu-ah chuan Document Registration atan leh Stamp Duty an lak dan chu hetiang hi a ni a.

    Categories of Document    Stamp Duty    Regn Fee
    1. Sale    8% on the market value of    1% of the property.
    2. Gift    the property   
    3. Exchange     8% on the marke value of  
        the greater value.      
    4. Simple Mortgage     4% (on the loan amount)    1% on loan amount subject to a
        subject to a maximum    maximum of Rs.5000/-
        of Rs20,000/-      
    5. Mortgage with possession    4% on loan amount    1% subject to the maximum
            of Rs.2,00,000/-
    6. Agreement to Sale     Rs.20     1% on the money advanced
    7. Cancellation     Rs.50     Rs.50
    8. Partition     1% on the market value of    1% subject to a maximum of
        the property but not exceeding    Rs.2000/- for each share.
        Rs.10000/- for each share
9. General Power of Attorney     Rs. 100
10. Settlement
i)In favour of family members     1% On the market value of    1% on the market value of
        the property but not     the property subject to a
        exceeding Rs.10000/-     maximum of Rs.2000/-
ii) Other Cases    8%  on the market value of    1% on the Market Value
        the property      

11. Partnership deed
i) In favour of family members     Rs. 50    1% on the Capital invested  
ii) Other Cases     Rs. 300
    
12. Deposit of Title Deed    0.5% on loan amount    1% on loan amount subject to a
        subject to a maximum of     maximum of Rs.1000/-
        Rs.5000/-    
13.  Release    1% on the market value of    1% on the market value of
        the property but not    the property subject to a
        exceeding Rs.10000/-    maximum of Rs.2000/-
14.  Lease
Lease below 30 years    1 % }  on the total amount    1% subject to a maximum of
Lease upto 99 years    4 %  } rent,premium, fine     Rs.5000/-
Lease above 99 years     8 % } etc.,
15. Declaration of Trust     Rs. 180     1% on the Amount

    A chunga mi ang hian Document hrang hrangah Stamp Duty leh Registration Fee hi Mizoram sawr-kar hian la ve ta se tun ai hi chuan sum leh paia kan indaih lohna a phuhruk ngei ang a. Tin, dik ni lo, ngaia kan loh neih tawh thil kan tih tam takte hi a veng thei bawk ang. Dan mumal kan neih loh avanga kan harsatna tam tak te pawh a veng ngeiin a rinawm a ni. Ngaihsam taka thiltih kan chin fo thin, a hnua kan buai leh phah ang chite hi tam tak chu a veng ngei bawk ang. Chumai piahah chuan Mizoram Sawr-kar sumbawmah sum kan hailut teuh bawk dawn a ni. Mahni leh mahni intodelh tura heti taka hma kan lak chuan Central Sawrkar pawhin tun aiin min puih hi a phur leh zualin a rinawm a ni.

    Chuvang chuan CM chu han ni ve ila chuan Mizoram bik sumbawm tihkhah dan tur ngaihtuahin sum lakluh dan tur ruahhmanna ka siam ang a. State danga an tih angin Stamp Duty leh thil dang dangah sum hailuhna siam a ni bawk ang. Chumi hunah chuan ram hmangaih tak taktu chuan phur takin min pui ang a. Mahni tanghma chauh ngaite erawh chuan min sawisel nuaih nuaih thung ang. Mi thawhchhuahsa ringawt ring hi chuan ram hian engemaw chen hma sawn mahse, mahni kea din tak tak hi a harsa awm si a. Ram hmasawnna atan mipuite hian Sawrkar puih hi i hreh lovang u. Sawrkar chu mipuite ta a ni si a v