Mizoram Police te chuan kumin January atanga September thla thleng khan hmeichhe chunga hleihlenna (crime against women) case 137 an ziaklut tawh a. Kum 2008 a\ang phei kha chuan hetiang case hi 639 ziahluh tawh niin, heng zingah hian 303 chu pawngsual case a ni.

Hetih rual hian New Life Charity Society (NELICS)-in an chhinchhiah chinah kumin chhung hian mahni intihlum 53 an awm tawh a, an zingah 15 chu hmeichhia an ni. Hmeichhia heti zat mahni intihlum an awm chhan hi, hmeichhe chunga hleilenna case tam hi factor pakhat a ni ve maithei a ni.

Pathianin hmeichhia te a siam hmangah hian mipa aia derdep, awmnem leh enkawl ngai deuh an ni a, chu chu Bible pawhin a sawi dan a ni. Heivang hian hmeichhiate chunga kuthhlak te, hmeichhe chunga hleilen te hi 'pa' nihna-a kan la ngai fo reng a nih chuan, kan 'pa' lutuk chiah tawh lo deuh tihna a ni thei ang.

Hetih rual hian hmeichhe thenkhat chu mipa tan pawha zilh deuhhlak ngai an awm ve bawk thin. Hmeichhe lu chu mipa a ni a, Mipa lu chu Krista a ni tih hi Bible min hrilh dan a ni a, chuvangin inrem tak leh lungrual taka khawsa ho tur chuan hmeichhiate hian mipa zah dan leh an thuhnuaia awm dan pawh an zir a ngai ve bawk.

Chhungkaw kehchhia (broken family) kan tihte hi nupa inlungrual loh avanga inthen vang emaw, inthen em lo pawha chhungkaw khawsak ho nawmlohna a ni thin. Kan ramah pawh hian In khat a cheng, inbe ngai lo leh chhungkua an nih pawh hriat mang lohva inmikhual pelh mai mai te pawh an awm nawk tawh mai. Heng te hi mipa in a lalna leh thuneihna a hriat lutuk avanga chhungkua a enkawl thiamloh vang te, nu berin pa ber zahna chang a hriat tawk loh vang te a ni thei bawk.

Chuvangin Kristian za-ah za nia inchhal ngam kan ramah hian chhungkaw lungrual, Kristian chhungkua ni awm renga nun dan kan zir deuh deuh a tul a. Tuna hmeichhe chunga hleilenna data atang chuan hetiang chhungkua hi lo, chhungkaw inenkawlna tha lo hi kan ramah a tam hle tih a lang thei a. Chu chuan rilru hrisellohna (drepression) thklenin mahni intihhlumna hial pawh a thlen thei tih a lang a. Chutah chuan mipa leh hmeichhia ten kan nihna tur ang taka nundan kan hman thiam a pawimawh hle a ni.