Aizawl khawpuia Assam rifle-te chu an hmun thar tur Zokhawsangah thlaleh emaw a lehpek emaw atanga insawn tan thei tura beisei an ni a. Vawi leh khatah an chhuak nghal vek thei dawn lo tih chu a chiang sa a, a tahtawla insawn zelin nakum lamah chuan an insawn zo thei maithei a, hetiang tur hian hnapawh thawh mek zel a ni. Assam Rifle-te chhuahsan tur ram hi zungkhat bawk pawh mimal tan hlehthlak a ni dawn lo tih CM in hman ni deuh lawk khan a sawi a, chu tih lai mekin tunah hian AR ram chhungah mi lian leh politicianten ram eng emaw zah an nei tih media lam atangtein kan hmu a, hei vang hian mipui ngaih a tha lo hle a ni.

    AR chhuahsan tur ram hi mimal kuta a luh ai chuan AR hi la awm reng se tih hi mipui duhdan chu a ni zawk hialin a rinawm a, kan CM zahawm takin zungkhat bawk pawh mimal pek an nih loh tur thu a sawi laia ram nei mi eng emaw zah an awm nia lang hi chhui chian a tul hle a, eng tianga lo nei ngawt thei nge an nih a, tu nge mawhphurtu tihte chhui chhuah vek a, dan ang thlapa LSC hi nei an nih phei chuan eng tia tih zui tur nge tihte pawh ngaihtuah a ngai hle a ni.

    AR chhuahsan tur ram hi ram zau tak, tangkai taka hman theih tur a ni a, ruahmanna fel tak nena engkim kalpui a nih chuan tuna kan khawpui harsatna tawh mek tamtak pawh chhawk zangkhai tham tur a ni a, chuvangin mipui pawh hian mimal kuta a awm chu kan rem tih loh hrim hrim a, kan thik thu kan tih chiat a tul khawp mai. AR-te hian an ram luah chin hi an enkawl ulukin an chei hnum em em a, an hnawksak viau lai hian kan khawpui timawitu an nihna thui tak a awm ve bawk a ni. Chuvangin an chhuahsan hnuah pawh fel fai taka engkim a kal theihna turin ruahmanna lian tak siam mup mup a hun tawh hle a ni.

    Eng pawh ni se AR luah ram chhunga mimal LSC nei ni awma langte hi sorkarin enfiah vat sela, Mi luah lai ram chhunga LSC an lo neih mai theih dan leh NOC petu tur dik takten NOC an pe em tihte en chian vek ni se. Seal inchhu a signature chuang ringawt thu tlingah ngai lovin seal dik tak a ni em? a sign-tu tur dik takin a sign em tihte pawh uluk taka enfiah a tul niin alang. Mi luah lai ram chhunga LSC an lo neih ngawt theih dan hi a mak tlat mai a, AR ram awmna VC/Local Council-te pawhin NOC hi an lo pe ve nge ni a, an ni kal kan hian LSC hi an lo siam zawk?. A pawimawh ber chu CM zahawm takin a sawi ang hian Assam Rifle chhuahsan tur ram hi mi mal kuta a awm loh hi a ni v