HP chuan PC bik atana an sumdawnnaa chuan $40 billion hailut tura hma an laknain rah tha a chhuah tak si loah chuan a buaipuite rilru a hahin a buai ta map mai, kar hmasaa an thupuan chhuah hnuhnung berah phei chuan hralh mai tur nge ni tihtawp mai tur tih chu an ngaihtuahna luahtu langsar berte zinga mi a ni. Hetia PC tawp mai tur thuthang a awm takah chuan kum 30 chuang zet he khawvela an lo vahvaihpui tawh PC chu kan hmu tawh lo maithei a ni. Tihtawp mai hi tun dinhmunah chuan thil tha berah Intel lam chuan an ngaihsak tawh a, hei hi a chhan chu HP PC sumdawnna hi tunah hian an buaipui hleithei tawh lo a ni.
Khawvela computer hi han ngaihtuah teh, HP hian a luah hneh hle mai a, hetih ruala hetiang taka tihtawp duhna a lo piang mai hi a manganthlak hle mai. a man a tlawmin a hman a nuam a, a leitute pawh hian kan ngaina tlang hle lawi si. Hetih rual hian hetia HP PC sumdawnnain harsatna a tawk ta mai pawh hi thil awm tak pawh a ni ve reng reng a, kan sawi tawh angin khawvel technology a thangchak em em mai a, tunah hian hetiang lam buaipuitute leh leitute pawhin PC ai chuan smartphone leh tablet, internet lam an uar tawh zawk bawk si a, a elpuite hi an thangchakn ram an la chak ropui bawk si a, hei vang hian PC hian zawi zawiin harsatna  a tawk a, a tawpah chuan hralh mai emaw, tihtawp mai emaw chu a siamtute ngaihtuahnaah a awm ta hial mai a ni.
Kan sawi tawh angin tunah hian HP PC sumdawnna hi lachhawng duh emaw, buaipui duh emaw an awm miau loh avangin sumdawnna tihtawp mai chu duthlan tur awmchhunte zinga mi a ni ta a ni.
HP hian kum 2010 chhung khan PC atang ringawt hian US dollar billion 40 chuang an beisei laiin an hmuh tak chu billion 10 chauh a ni a, an ruahmanna kalpuina leh an insensona ngaihtuahin buaipui chhunzawm zel chu an tui tawh lo a ni ber mai. Tun atanga kar (week) 12 atanga 15 inkar bawr vel chho khian board member-te chu thutlukna siam turin an inhmukhawm dawn a, heta an thutlukna a zir hian HP?PC?sumdawnna hmalam tur chu a chiang mai dawn a ni. Engtin nge an tih zel dawn ilo ngaichang phawt mai teh ang??