Vantlang tana thawktu Anna Hazare chuan India rama eirukna dona tur dan 'lokpal bill' huam zau taka siam ngiata chaw a ngeina chuan rah chhuah neiin an duh dan hi Parliamentary Standing Committee ngaihtuah turin rem tih a ni ta a ni.

    Mizoramah pawh Corruption do kawngah mi thahnemngaiten hma an la mek a. Mi thahnemngaite hmalakna tichak tura mipui pawimawhzia chu Anna Hazare hmalakna atang pawh hian thui tak alang thei a ni. Corruption chungchang han sawi ila, haw lo hi kan awm lo tih ngam a ni a, mahse heti taka kan huat rawn si hi, kan ram leh hnam min tichhetu bera kan ngaih a ni bawk si a. A thu a kan duh lohna leh kan huatna kan sawi ringawt hi chuan awmzia a nei thui lo tih a lang ching hle a ni.

    Mizo mipuiin Corruption kan do dan hi kan thlak loh a, a sawi sawi ringawta kan do a nih chuan kan do hneh dawn lo tih hi a chiang sa ran a, a tui hang hawp ve phak loh avanga a do pawla tang mai mai, a hlawkna tel ve tur a awm chuan ngawi leh hmiah theite kan nih mai mai chhung hi chuan corruption hian ziaawm lam aiin zual lam a pan lo thei lo ang. A sawia sawi leh a tiha tih hi a tanrual loh chuan do hneh mai mai chi a ni lo reng a. Rin aia thuka zung a lo kaih a, a hrem theitute nen lam an inthlun zawm phei chuan Corruption do hi thil hautak leh buaithlak tak a ni.

    Corruption do tur hian mipui lam hian tih takzeta aw kan chhuah a, a tul a nih chuan sorkar pawh kan nawr a ngai. Lokpal bill pawh hi Anna Hazare-te duh ang thlap pawh hian parliament-ah pass ni mah sela, state bika hman tur chu state sorkar kuta innghat chin tur thui tak a awm tho tho dawn a. Dan tha deuh pawh hi a kengkawhtu tur ten an kenkhawh that duh loh tlat chuan tangkai mang lovin a awm thei a, Corruption dona dan tha tak pawh nei mah ila a kengkawhtu lamah a hlawhtlin leh tlin loh hi a innghat thui hle ang. Chuvangin Mipui lam hian corruption dona kawngah tih tur leh mawhphurhna nasa tak kan nei a, a tul ang zela sorkar tichak tur leh nawr kal tura kan tan tlan a ngai a ni.

    Mizoram hi chhe hle tawh nitein kan insawi thin a, kawng leh lamah mi ram dinhmunte nena khaikhin chuan siam that theih, harsa lutuk lo va la din thar leh theih kan ni tih hi kan hriat chian a pawimawh khawp mai. Kan chhiat dan hi beidawnthlak khawp a la ni lo va, corruption hian min la bawh bet lo, mipui kan tlanrual phawt chuan kan rin aia awlsamin kan insiam tha mai ang.