Lalbiaktluanga’n goal hnih thunin goal thum a thawk chhuak a, vawiina Red Ribbon football quarterfinal-ah Electric Veng chuan harsatna lian tawk lovin 4-1 in Mualcheng an hneh. Hnahthialin hma lam an pan zel a, Malsawma goal awmchhun hmangin 1-0 in Chanmari an hneh a, semifinal-ah Electric nen an insu ang.

Electric hmaah Mualcheng lian zo lo

 

Team hlun tak Electric-in Aizawl pawn team an ngam zel a, in 300 pawh tling lo khua Mualchengin mipui hmaah thilmak an thlentir thei ta lo.

Zam deuh chungin Mualchengin bul an tan a, a tir atanga ngampa taka khel nghal Aizawl team-in goal an nei hma hle. Corner chhawrin Mualcheng defender-ten ball an pet chhuak thei lo va, 10min-ah hnai set sawt atangin Lalhlimpuia'n a pet lut.

Keifang an hneh tum khan Hlimpuia hian second half atangin a khel a, goal thunin a siamsak bawk a. Mualcheng hmaah bul a tan nghal a, Electric goal hmahruai a thun leh nghal.

Mahse, khawpui pawn team zinga beiseiawm Mualchengin 3min bak si an phur lo. Lalruatpuia goal sut chu Electric defender-in dang pialin, ball-in experiance goalkeeper Vanlalhriata a bum a, Mualchengin an si an sut ve leh nghal.

Goal an thun hnuin Thingtlang team an ngampa sawt a, YMA tournament-a team hlawhtling ber Electric keuhthluk ngei tumin inkhel awpbettu an ni hman. Amaherawhchu an mar rei thei tlat lo.

Electric star player leh goal pawimawh thun thei Lalbiaktluanga chuan 28min-ah hma an hruai nawnna goal a thun a, an lawm kher mai. Hmahruaitu zawkin khelmual an thunun zui a, Biaktluanga chuan vei lam atangin tha zetin a khalh lut a, fuh lutuka vawrh luh zuiin 40min-ah K Laldinthara'n Electric hmahruaina belhchhanin a tauh lut.

Second half-ah Mualcheng an insiam tha a, goal nawrtu zawkah an tang nghal. Mahse, khaw chhak team hian an nawr luat tuar lovin, half way line (centre line) an pel vek a, hetih lai hian tibuaitu nei lovin Biaktluanga'n ball a khalh lut a, goal thleng rawka khalh tlangin, 69min atangin 4-1 in Electric-in hma an hruai.

Inkhel boruak a tang zui hle a, referee-in yellow card a phawr nual a, goal dang erawh a luh belh tawh lo. Khaw lian lo tak atanga team tha tak nei thei Mualcheng chuan hun tawp lamah an khelhpuite goal an tiderthawng viau thung.

Mahse, centre-back rinrawl Laltanpuia hovin Electric an khawng tluan thei a. 90min hnuah Electric left-back Lalruattluanga chuan Mualcheng goal bulah hliam a tuar a, a tirin harsatna lian lutuk nei lo mah se, Mualcheng player sutna avang hian nikhawhrelovin a awm zui. Damdawi in panpui a nih hnuin a dinhmun a ziaawm a, thawhtanni semifinal first leg-ah a khel thei dawn em tih erawh a chiang hman lo.

Team 212 zinga quarterfinal thleng thei Mualcheng chuan semifinal thleng zo lo mah se, sangha humhalh chauh ni lovin football an thiam tih an lantir a. An khingpui el zo lo deuh mah se, huaisen taka an beihna avangin in 300 khua hian in sang veng hmaah dem an hlawh lem lo.

Khelmual chhung leh a kotlangah chak phuin YMA trophy vawi thum la thei awmchhun Electric-in Lammual an thunun a. Zirtawpnia inkhel zinga team tawiawmtu tha ber lawmman leh lawmman tesep dang pawh an la vek.

Tumruh Hnahthial hlawhtling zel

235min chhung goal thun lova hun an hman hnuin Hnahthial tal Malsawma'n a khung a, an chakpui nghal. He goal hlu tak a luh theih nan hian striker chak zet Sangkima’n a thawh hlawk hle a, ding lam atangin Chanmari defender pathum lai a tlan pel a, duhthusama thain Malsawma tan leihrulah a siamsak.

Kum 20 kal taa football thiam veng zinga sawi thin Chanmari-in goal chhuah duh lo Hnahthial an su tlang zo bik lo va. First half-ah Aizawl team hian an khel chhe lovin an ball vawrh tha tak tak hmangin goal pawh an nei teuh viau. Mahse, rawlthar rual awmkhawmna Chanmari-in senior player an neih loh an tuar a, second half-ah an bet tlat.

46min atangin player nei tha zawk Hnahthial nihna a lang chiang a, khelmual thunuin second half 11min-ah goal an nei thei. Khung belh turin hun tha pawh an nei a, mahse, goal thuntu Malsawma chuan hun tha lutuk a hloh zui. Chanmari tlang hnung su tlang thin mah se, goal dang thun turin goal thuna harsatna an neih chuan a umzui leh tho mai.

MLA bial intihsiaka champion hnuhnung ber Hnahthial hian harsatna tam tak an tawrh rah an seng chho zel a, sum leh pai vanga an buaina tiziaawm turin a chhe berah Rs 15,000 an dawng phak ta.

Team inhuamna nasa tak avangin Aizawlah an lut rawih a, sum leh paiah harsa tam takin a tibuai a, ningani thleng khan player an la inchahkhawm. Thlenna mumal nei lovin an awm a, Sports Council-in hun khaihlak laiin Ramhlun Sports Complex-ah a thlentir. Mahse, an thlen zui zel a rem loh avangin an inpu chhuak a, kalna tur hre lova an awm laiin Republic Veng YMA-in duhsak takin kar hmasa inrinni atang khan an mikhual.

Republic Veng inpekna avangin Hnahthial team an lawm hle a. YMA hruaitute chuan player-te chu mimal ina thlentir vek an tum laiin, team duh angin Community Hall-ah an thleng ta zawk a. Republic-a an cham chhung hian mi inphalten an mamawh tui leh thil dang an phuhruksak zel bawk. 

Helhkam lian tak nei tel chungin tournament tir atang khan Hnahthialin an khel chho va, Armed Veng South leh Khawzawl II te penalty hmanga an hneh hnuin, Chanmari an paltlang leh a. Mahse, semifinal-ah an player tha pali ngawt an chhawr zui thei hmel lo.

University exam lai a nih avangin Armed Veng S an khelh tuma kut tuar goalkeeper Laldinliana bakah, Chanmari an hnehna goal thuntu forward Malsawmate chuan an khel thei dawn lo va, an defender pahnihte chu exam-in a tibuai bawk.

Team member 20 pawh tling lo an nih laiin, mi paliin an kalsan leh dawn avangin Hnahthial an indaih lo viau dawn a. Champion tura rin kai leh team lian tha tak Electric an sut a tul zui dawn leh nghal.