Tluang taka kalpui a nih hnuin, nimin khan Reb Ribbon Football chuan harsatna chi hnih a tawk. Chawhma chhung zawng AR Lammual an hawn loh avangin inkhel tum li awm turah vawi hnih chiah khelh zawh hman a ni a. Republic Veng field-ah Hnahthial goalkeeper-in beih a tawh vangin inkhel tihtawp a ni bawk.

Lammualah khelh li awm tura ruahman a ni a. Mahse, chawhma chhung hun hman theih a nih loh avangin a hnuhnunga khel tur pahnihte an inlan hman lo. Inkhel hman lo Mission Vengthlang/Salem Veng leh Chaltlang/Khawzawl I chuan vawiin hian Mualpuiah an khel thung dawn a ni.

Republic-ah tluang taka khelh thum  zawh a nih hnuin a hnuhnung ber Hnahthial leh Armed Veng South inkhelh laiin harsatna a thleng. Goal awm lovin first half a zo va, second half-ah 14min 17sec an khel hman tihin Hnahthial goalkeeper chu a nghawngah sairawkherha perh a ni a, tlu tawpin nikhawhrelovin a awm nghal a, inkhel tihtawp a ni zui nghal.

Vawiin chawhma dar 9 hian AR Lammualah Hnahthial leh Armed Veng S-ten fan awm lovin an khelh hmabak  31.43min chhung an khel zawm ang.

Harsatna tenau an tawh chungchangah Mizoram Football Association honorary secretary Lalremtluanga chuan   engkim chinfel a ni tawh tih a sawi. Lammual pawh buai tawh lo turin an be fel a, nilaini atanga a tawp thlengin tluang taka an kal tawh a beisei.

Ruahman danah chuan vawiin hian round of 16 khelh li zawh tum a ni a. Mahse, nimina khelh zawh tura ruahman sa khelh thum zawh loh a nih avangin nilaini hian last 16 khelh riat zinga khelh thum zawh a ni ang a, ninganiah khelh nga dang chhunzawm a ni thung dawn.

Sial kaih haw tum team 212 zinga team 13-in round of 16 an thleng chiang tawh a.Tlang tawhte hi Aizawl khawpui chhung team sarih leh khawpui pawn team paruk an ni.

Nimin inkhel zingah Falkawn chuan si li fai ngawtin Vaivakawn an hneh a, ITI chuan CYMA champion lo ni tawh Ramthar Veng chu si thum faiin an hneh bawk. YMA tournament-a team hlawhtling ber pahnih Electric Veng leh Armed Vengte an tlang zel a, 2006 CYMA champion Kanan Veng chuan harsatna nei miah lovin an khingpui apiang an hneh zel bawk.