Mihring a zirin ‘Hmangaihna’ hi a che-nâ a ni mai lova, a lo dawngsawngtu a zirin a tlaknat leh nat lohna pawh hi thui fe sawi tur a awm ang. Zaimi duhawm tak takte hi mihring ve bawk an nih angin hmangaihna leh hrehawmna te, thinrimna leh rilrunatna te an nei ve vek a, nimahsela mimal nun ang deuha a lanna laiah an mahnia awm ‘love affair’ hi an sawi chhuak ngai lo.

Chutih laiin, rilru inhawng takin an hringnuna hmangaihna lo thleng leh chumi ina a hrin chhuah hrang hrangte chu a vawikhatnan sawi chhuahna an nei hlauh mai a, heng an thil tawn hrang hrang atangte hian hmangaihna lipuia cheng mek leh la cheng lo te chenin kaihhruaihna tha tak a pek ngei an beisei.

Zawhna kan zawt a, chuta an hlimpui ber chu, ‘Mipa vang hian i mittui a tla tawh em? tih a ni a, Pensy, Mimi (Icon) leh RC-i te hian mittui a tlem, a tamin an lo seng tawh.

Pensy B.Lalthangliani    
“A hmasain hmangaihna chungchang hi sawi phawt ila, ka la thutak (serious) hle a, amaherawhchu uchuak lutuk chu ka ni chuang lo. Mahni thil tih leh buaipui lai thulh phah leh tih loh phahna ang em chuan ka la awm lovin ka hria. Tih tur thulh tur em chuan ka ngaihtuah tlut tlut ngai lo bawk a, mahse mipa vang hian mittui chu ka seng tawh a lawm.Hmangaihna vanga rilru nat leh hrehawmna ka tawh chang hian ringtute kan nihna ang bawkin Pathian hnaih hi a tha ber tho tho va, relationship chungchangah pawh a ni tho.

 Kan tleirawl laiin ka u hian he thu hi mi hrilh thin a, “Kan hmangaihte ai chuan min hmangaihtute hi an tha a, chumi piah lamah keini aia Isua hnaih lehzualtute hi an tha ber bawk” tih hi tun thleng hian ka la vawng renga, ka la thlahthlam ngai lo.

“Rilru nat chang leh tawrh thiam har tih changte chu a awm lo thei lova, mahse hetiang hunah pawh hian indawm kun tlawk tlawk lova, thil a nihna dik tak pawm thiam a, chumi atanga dinhmun duhawm leh tha zawk thlen ngei theihnana theih tawp chhuaha hmalam pan zel hi a tha a, a him ber bawk a ni.

“Engpawhnise, Hmangaihna chungchangah hian Pathian rawn tam hi a tha ber ka ti a, Pathian min siam danah pawh chithlah turin min siam a, chu chu kan tih makmawhah ka ngai.

“Ngaihzawng neih hun chungchangah hi chuan ngaihdan hrang hrang a awm thei anga, keima ngaihdanah chuan B.A pass hnu-ah te ni thei se a tha berin ka hria. Chuan, hmangaihna hi mi-hringa bet tlat anih rualin mihring hmangaihna hi chuan rei a daih ngai lova, Pathian hmangaihna chuan chatuan a daih thunga, hei pawh hi hriat nawn leh a tha hlein ka hria.

Mimi Lalzamliani
“Hmangaihnaah kher hi chuan ka ‘serious’ khawp mai. Mahse, ‘lutuk’ hi tha ka ti lova, mipa vang hian ka mittui a tla tawh a sin, rilru te pawh a na a, tal chhuak leh tur chuan hun a duh a, theihnghilh tawp te a har.

“Bible chhiar leh tawngtai tlut tluk te hi chu a tha thova, mahse chutianga damna min pek leh theih chu ka ring chiah lova, hun hian a liam pui ve maiah ka ngai.

“Ngaihzawng neih hun leh hun loh chungchangah chuan tlema puitlin deuh hun hi nghah a thain ka hria a, tunah chuan middle leh high school vel atangin kan buaipui nasa hle a, zirnain nasa takin a tawrh phahin ka hria. Chutih laiin, kan buaipui lai hun kha a nawm vanglai takte a lo ni leh zel bawk nen, buaithlak ve ang reng tak chu a ni.

“Tunah hian ka la naupang a, kum 20 kan tling dawn dek dek chauh a, kum 14-15 vel te pawhin hmangaihna hi an buaipui nasa hle tawh si a, mahse ngaihzawng neih hun atan chuan hun tha ber chu a ni lo a lawm.

“Tuna kan hmangaih leh duh em em te, thihchilh te pawh kan ngam hial te hi a lo rei deuh chuan a reh ve mai a, ni e, hmangaihnaah hi chuan a la na deuh leh ho lam deuha ngaite pawh an awm a, an za vaia hrut rual vek theih pawh a ni lo.

“Hmangaihna hi ka thalai puite hian la na lo se ka duh a, a chhan chu kan nun zawng zawng hi a tichhe thei tlat. Chu bakah, thil sual te an tih phah thei a, mahni intihhlumna hial lo awm pawh nise, dem theih ngawt chu a ni bik lova, hmangaih-na hi a ropui a, thil a ti thei bawk si a, fimkhur chu a ngai hlein ka hria.”

Zoramchhani (Rc-i)
“Keini ang rualah chuan ngaihzawng hi ‘nei lo’ tih tawp kha a theih lohva (A ngawi deuh vang vang phawt a) Mipa vang hian ka mittui hi a la tla chiah lova mahse a parawl ve tawh thin. Hmangaih berte nen pawh ni se, a kalkawng hi a felfaiin, a tluang reng thei bik lova, rilrunat leh hreh-awmna te hi chu a awm lo thei lo.

“Ngaihzawng kan neih a nih pawhin kan hnathawh leh thil tih lai chhe khawpa buaipui leh tul pui chu a thain ka hre lova, kan chhiatpuina tur leh chet fuh lohna tur, rawngbawlna thlenga thil tha lo thlen thei tu a nih theih dawn chuan then ngam te pawh a ngai. Midang kan hmu lo anih pawhin kaltlang mai chu ka ngaihdan a ni.

“Chuan, Pathian tel hian ngaihzawng hi zawng theuh ila, keimahah pawh a ni thova, hmangaihna hi a tha lam zawng zela lak thiam a tul a, kalpui hram hram theih ni bawk se a tha hlein ka hria. Rilru a lo na anih pawhin a nat belh zel dan tur zawng lovin tawrh thiam dan te inhnem dan te zawn hram hram tur a ni a, a hun lai chuan a na viau pawh a ni ang. Mahse, thinrim lai leh lungngaih lai hi chuan chet buan buan loh hi a inchhirawm loh ber.

“Tin, ngaihzawng kan nei a nih pawhin intawngtai pui tawn te hi a tul hlein ka hria a. Hmangaihna avanga engemaw tawrhna a lo thleng anih pawhin rilru fim takin ngaihtuah ila, chuti lo chu a tuar tu tur chu keimahni bawk kan ni a, mahni inngaihtuah lungpuam lo turin tute pawh ka chah duh bawk a, a chhan chu a hrehawm mai mai. Ni e, chhungril tak chu a na ngawih ngawih a lawm, lo la na fal bik an awm pawhin ka dem chuang lova, mahse rilru fim tak pu hram turin ka ngen duh.

‘Ka la naupanga, ka naupan vang mai a nia’ tihte hi kei chu ka duh lo reng reng. Ngaihzawng neih chungchangah kher lo pawh kan thil tih reng renga hi ‘kan puitlin phahna tur a ni ang em’ tiin ngaihtuah fo ila, chu chu kei pawhin a theih ang angin ka bawhzui renga, hmasawn zel pawh ka tum”