‘Argneng’ hi buaipui tham a ni a, a lo chhuah dan atanga inenkawl dan thleng hian hriat makmawh a ni.

Eng tia lo awm nge?
Mihring vuna thil mawm chhuahna leh hmul vel atangin a lo intan a. Heng atang hian sebum an tih thil mawm chi khat chu lo chhuakin hei hi a awm tawk lek a nih chuan vun tan a tha hle a, a ti no sar thei ani. 

Chutih rualin a chhuak tam lutuk anih erawh chuan hmai a lo mawm ta vak a, hmul lo chhuahna atangte chuan thil mawm kan tih ang chi hi lo chhuak tha thei tawh loin, pawn lam atangin a block ta nghal a, arngeng kan tih hi a lo chhuak ta thin a ni.

Arngeng awm tamna
Hmul no leh thil mawm chhuah tamna: Hmai, Beng, Awm, Hnungzang leh serh bul velah a tam thin hle.
Arngeng lo chhuahna chhan

Mihring taksa ah hian mipa hormone leh hmeichhe hormone an tih hi a awm a. Mipa hormone hian vuna awm hriak lo chhuahna te chu tilianin chuta tang chuan hriak lo chhuak hi a tam nghal hle a. Hmeichhe hormone erawh mipa hormone nen a inang lo thung. 

Sebam an tih hriak a tichhuak tam lem lo a, mipa hormone a lo san hian hriak lo chhuak tamin chu chuan khawimaw laia block a siam ta a, arngeng kan tih ang hi a lo awm ta thin. Pasal nei hlim nu then-khatin inven nan damdawi an ei hian arngeng a tam phah hle thin bawk.

Hmeichhia te hian thi an neih hma a an taksa thil tui hnang ang chi an kawl reng thin a, chu chuan taksa a awm hmul leh a chhehvel chu rawn tivungin block a siam a. Thi neih hmain arngeng hi a tam duh hle a, thlan ngah tan phei chuan a nasa zual hle bawk.

Ei leh in leh boruak
Arngeng nei te chuan chocholate, coffee, thil sa leh thak lam chi, butter, oil tamna make up hman te hian a tipung zual thin a. Thlasik lai hian a zual hle thin. Ni sensa hnuaia awm hi a tha lova, hei hian thlan a tih tam bakah arngeng a tipung hle bawk.
Arngeng sawr hun a nih hnu pawha dah reng a nih chuan kawchhung atanga thil lum lo chhuak chuan a tikhal a, a ti dum ta thin a ni. Vawi khat i sawr zauh a, awmzia a awm lo a nih chuan tihchhunzawm lo mai rawh. I ti khawlo vek dah ang e. A vung anga, hnai lain, chu chuan ser a siam ang a, mawi lo takin i hmai kha a awm thei a, khawih reng reng loh a him zawk.
Dawhtheih a ngai

Arngeng hi engemaw hrang hrang vanga lo chhuak thin a nih avangin enkawlna chungchangah pawh ni reilote chhung ni loin a thla tel tak meuh nghah a ngai thin a. Hun a duh reina chhan chu, sawi tawh angin thil dang vang leh hormone vangte a nih thin vang a ni. Arngeng hi inkaichhawn theih a ni lova, a nasa viau a nih chuan damdawi emaw injection na hmanga enkawl hial a ngai thei a, a thla tel tak meuh a mamawh thin. 

Tleirawl chhuahtirh hian a nasa duh hle thin a, mahse kuta khawih emaw hiah hiah loh tur a ni a, darthlalang hmaa hun rei tak tak thut pawh a tha lo.Tui intlem leh mutkham lohte hi a haw hle tih pawh hriat a tha a. A nasa viau a nih chuan doctor entir vat kha a finthlak hle. 

Arngeng hi enkawl dam theih a nih avangin tleirawl te khan hman-hmawh thut thut loin hun engemaw chen innghak hram hram aniang chu.

============

Arngeng langsar zual bihchianna

Arngeng pangngai chu tleirawl tirh hian mipa leh hmeichhia ah a awm tan thin a. Mipa ah a nasa zawk thin nghe nghe. Nghawng, hnungzang leh koki velah hian a tam thei hle.
Naute hnute hne lai te pawh hian an nei ve tho va, hei hi nuin a pai laia an thisena mipa hormone lo lut chu naute taksa ah a luh ve tak vang niin an lo pian hnu pawh hian an taksa ah kum tam tak a awm thei.
Arngeng lian tak tak - Hnai perpur leh hmul inkara hrik a luh vangte in arngeng lian tak tak hi a lo awm thin a. Hei hian chaw ei chak lohna te, khawsik leh taksa rawl ang chite a thlen thei. Hnai la a nih chuan arngeng hi a sen vut a, kut a khawih miah loh tur a ni a, a hun tawh viaua a lan chuan thil danga lak chhuah dan ngaihtuah tur.