Harsatna 1-na: Ngaihdan inkawkalh
Tluanga leh Sangi te nupa hi hnathawk reng renga buai an nih avangin nupa nun hlim tak an hmang thei lova, inkawmna hun mumal pawh an neih theih loh avangin an inzawmna chuan a tuar tan ta. Kum 5 an awmdun hnu pawhin chhung-kua an din thei ta reng reng lo mai a. Tluanga hian naupangte hi a ngainain a lawm thei hle a, mahse nu ber erawh buai reng renga khawsa a ni si. Chutah chhungkaw din a hun ta tih a han hriat meuh chuan khua a tlai zo ta! Hetah chiah hian nupa inkarah innghir-nghona leh inpuhtawnna chhuak nghalin boruak a chhe ta hle a ni.

Chinfel dan: 'Fa neih' chungchanga kha chu dah tha rih phawtin tun hmaa an hlim dun laite kha ngaihtuah kir leh a tha. Khawsa dun si a, engmah tih loh hi thil pawi a ni thei tlat. In hmangaihna ringawt hi chu thil harsa a nih loh laiin duhdan leh ngaihdan intawmpuina erawh thil awlai lo tak a ni. Harsatna inhrilh tawn a, inhriatthiam tawn pawh a pawimawh hle ang. A tul chuan rilru lam thiam te pawh rawn a tha.
Harsatna 2-na: Bultanna derthawng
Hmingtei te inneihna hi nu leh pate duhthu-a kalpui a ni a. Kum a liam hnu pawhin nau a pai thei ta reng reng lo mai. Mi zawng zawng, a pasal chenin an dem rawn luai luai a, han inenfiah lam chu khawi lamah...A pasala nu chuan, 'Fa i neih theih loh chuan min hawsan mai rawh' a tichhen bawk si. A pasal lah chuan a dinhmun a hriatthiam pui lo leh nghal a, a rilru a hah hle a ni. Doctor chuan a taksaah thil fel lo a hmu bawk si lo! An hriat leh dan chuan a pasal chu a chiang lo zawk a ni reng mai, engtin nge ni ta ang?

Chinfel dan: Khawvelah hian dam man awm hliah hliah a awm laiin thih man awm mumal lo erawh a awm tih hriat hmasak phawt a tha. Zahna tel miah lovin a harsatna sawi chhuak rawh se... A rilru a hliam a nih chuan mi thiam rawn tur a ni. A pasal leh chhungte lam atanga ngaihdam dilna tam tak a mamawh lem lova, hun harsa tak a lo paltlang tawhna avang khan bul tan thatna a neih leh theihnan theihtawp chhuah pui zawk tur. A tul chuan dan hremi pawh rawih a sual lova, Urologist emaw te pawh entir a tha a, fa neih theih dan kawng zawn vat vat a pawimawh.

Harsatna 3-na: Nau chhiat
Pari chuan a vawi thum nan nau a chhiat leh ta tla mai. A hmasa zawk pahnihah khan a pasal chuan thu nelawm lo tak sawi chhuakin, 'Lehpek a i chhiat leh vaih chuan....' a ti rum rut a. A pasal chhungte lam pawhin an hmu nep tawh hle bawk. An inkar boruak that leh that lohna tur chu fa neih theih leh theih loh chungchangah a innghat ta a nih chu. A vawi thumna pawh hi a chunga pressure a nat em avangin a zo lo leh pek a. A pasal chuan inthenna dar a vaw ta nghal a, Pari rilru hahna chu a zual ta sauh mai a ni.

Chinfel dan: Nauchhiat hi rilru lama harsatna tawh vang a ni duh viau a. Hei hi enkawl vat a nih loh chuan boruak tha lo a thleng thei. Tin, a mipa pawh hian thil awmdan a hrechiang tur a ni a, a nupui leh a chhungte inkarah remna palai a ni ngam tur a ni bawk. Hmeichhe lam thiamte chuan he harsatna hi engemaw chen an pui thei a. Hmanlai rilru put thinna hian harsatna a thlen nasa hle a, Pari pawh hian chhungte tanpuina a mamawh hle.
(Chhunzawm tur)