Nupa hlimna hi inneih rei leh rei loh lamah a innghat ber lova, putar/pitar nih tawh hnu-ah pawh engtinemaw taka hul riauna leh tunhma anga inngainat loh leh innin(kham) deuh lek lek changte hi a awm ve fo thin. Chutih laiin, hmeichhe tana zawhna lian tak awm taa chu, 'Anih leh engtinnge ka pasal duhzawnga ka awm anga, min ngainat deuh deuh theih ang le?" tih hi a ni a, pasal te hawiher leh chezia bakah an tawngkam hman te a lo danglam a, tunhma ang lo deuha a khawsa ni-a hriatna i neih phei chuan engtin emaw taka hmalakna i neih ngei chu a ngai dawn tihna a ni.

Puipuii chuan fa pahnih - kum 4 leh 2-a upa a nei tawh a, primary sikul-a zirtirtu a ni a, heti chung hian MA a zir mek bawk. A duhawm em em a, fel pawh a fel hle. Inchhung khawsak rel leh fanau te enkawl chungchangah pawh sawi-sel em emna tur awm lovin a felfai hle a ni.

A pasal Liana hi driver a ni a, kal hun leh haw hun em em pawh a nei lem lova, a tul thei hle ringawt mai a. In-a a lo haw changte hian sawi-sel tur ringawt hi a zawng nghal emaw ni tih mai turin In chhung a enkawl dante a rawn sawisel nghal bawrh bawrh a, 'a van rimchhe ve' tih vel mai maite hi a thupui ber a ni hial.

A chhan leh vang tak pawh hriat harsa khawpin a tawng tlem nghal a, nupa hlimna pawh a tuipui tawh lova, kum 5 an innei tawh a, tunah chuan karkhatah vawi khat pawh a peih mumal lo a ni ber.

Puipuii anga harsatna tawk hmeichhia hi an tam em em a, chhungkaw tana tha thei ang ber leh an theihna zawng zawng an seng chung pawhin eng-emaw chhan hrang hrang vangin hriatpui an ni ngai lova, haider an ni fo.

Puipuii hi a la naupang a, a pasal tihhlim leh tunhma anga a ngainat theihna tur atan engtia tih tur nge tih phei chu a hre lo hul hual.

Engngatinge a pasal hian a huat deuh tlat le? Engvanga be tha peih lo nge a nih? Engvanga sawisel tur ringawt zawng zawng nge maw a nih le? Hetiang hi anih deuh tak nuai avangin Puipuii tan chuan a buaithlak hle a, hun khirh tak a hmachhawn mek a ni.

Kum 5 dawn an awmdun tawh hnu-a nupa inkara hetiang thil a lo thleng ta mai hi pawm theih a ni lova, hriat-thiam theih lah a ni hek lo.

A mizia leh nungchang tidanglam tur hian tihtheih a nei tlem em em a, thianghlimna chungchang a sawi neuh neuhah pawh hian hmalak vakna tur a vâng khawp mai. Engpawhnise, hetiang hian i han ngaihtuah dawn teh ang.

Harsatna: Sum leh pai harsatna vanga rilruhah-na leh buaina
Chinfelna: Amah nen thu dun ula, sum leh pai harsatna hi engtia chinfel chi nge ni ang tih leh a hna thawh hi tlema tih thawl (loose) dan awm se, chhungkua tan hun a hmang tam thei ang em? Hah (chauh) ngawih ngawih vanga nupa hlimna hman loh rikngawt mai zelte hi thil pawi tak a ni. Inchhung enkawl chungchang vang maia nupuite be tha peih lo hian harsatna engemaw chu a nei chiang.

Harsatna: I bal ang reng a, inchei leh lan danin a hip lo
Chinfelna: Fa pahnih nei tan chuan fai ving venga invawn hi thil harsa tak a ni a, inchhung enkawl ngai bawk nen buaithlak tak chu a tling. I bal a, \awp deuh taka i awm chuan nangmahah pawh inrintawkna a bo thei a, lan dan a fuh loh chuan rilru pawh hi a kaltluang mawh teh mai a nia. Nu berin inchei a taima tawk lova, pasal te mit an lak tam vak loh phei chuan mipate hian rilru dang an pu hmâ hle a, hmeltha leh duhawm te hi an hmu nghal zut zut thei.

Harsatna: I phur tawk lo
Chinfelna: Mipate hian an nupuite hi engtik lai pawhin itawm (sexy) reng se an tih lem loh laiin, zan lamah chuan mut dawna hak turte pawh a hrangin nei se, thawmhnaw danglam deuhte hi ha ve thin se an ti ngawih ngawih. Chuti lo zawng, beidawng takin an awm nghal mai thin a, chu chuan nupa hlimna pawh a chawk buai vek. Thlengsil leh inchhung tihfai hnu-a mut nghal tawp te hi a tha lova, inbual fai emaw insil fai hnu-ah chauh mut a tha a, perfume hman a sual lo. Zan lamah na na na hi chuan pasalte a hlim thei ang bera siam tum tur a ni a, 'sexy' deuha han chet nek nekte hi a pawi reng reng lo.
Mipate hi an mit a vir hle a, taksa inkhawih/dai hmasa miah lo pawhin an thil hmuh atang hian an buai nghal rum rum thei tih hriat kar tur !