Pawl pathum, Peoples Rights to Information and Development Implementing Society of Mizoram (PRISM), Society for Social Action (SOSA) leh Federation of Mizoram Trade Union (FOMTU) te chuan Mizorama eiru nia rinte mipuiten an thlan theihna tur an buatsaih tur thu Inrinni khan Aizawl Press Club-ah an sawi a. He hunah hian PRISM President R.Vanlalruata, SOSA General Secretary F.Hmingthanga leh FOMTU President PB Lalsawmliana bakah Lalhmingliana Saiawi leh hruaitu dangte an tel a ni.

Heng pawl pathumten eiru nia rin mipui thlan tir an tum chhan chu mipuite nawrna avang te, kan ram tichhetu eirukna nawrchep an duh vang leh sorkarin eirute dim an tum loh thu an sawi avanga pen chhuak an nih thu an sawi a. Dan hmanga hremna an tawh loh vang leh mipuiten kan endawng tawk loh vangin corruption a nasa niin an sawi a. Mipui chanai eiruk hmanga in leh lo ropui tak din a, tu leh fate zirna tha ber bera kal tir a, khawtlang, kohhran leh pawlah a kul a taia inhmang a, mitha ber ber lena lengte hi tute nge an nih mipuiin hria a, endawng tura an duh thu an sawi a. Heng mite chungah hian dan chhungah mipuiten ro kan rel ve a hun tawh nia an hriat thu an sawi a ni. 

Eiruk tihtlem dan tur tam tak zingah FLAM ten 'Thih Huamin Aw' lehkhabua an ziahah eiru thinte chu khawtlanga zaka siam te, kohhran leh tlawmngai pawl hmanga nawr leh man chhuaha dan hmanga hrem tha an tih thu an ziah chu tha an tih avanga bawhzui an tum phah tak thu an sawi tel bawk a ni. Eiru nia an rinte chu politician te, sorkar hnathawk te, kohhran hruaitu te, pawl hruaitu te, contractor leh supplier te, sorkar emaw, mahni awmna pawl pawisa eiru lai nia an rinte thlengin a huam dawn niin an sawi bawk.

Zawhna chhangin heng pawl pathum hruaitute chuan eiru nia rin mipui an thlan tir tumnaah hian anmahni thua thil ti an nih thu te, tuar tur a awm anih pawhin tuar ngam tura pen chhuak an nih thu te, anmahni zingah pawh mipuiten rinhlelh zawng an nei anih chuan an thlan theih tho thu leh finfiah an ngam thu te an sawi a. Politics-a inbeih nana hmang lo tura mipui an beisei thu leh fimkhur taka kalpui an tum thu an sawi a. Heng an thlan chhuahte hi October 3, 2009-a Anti Corruption Convention an buatsaih hunah mipui kalkhawmten tul leh tha an tih anga an hming puan chhuah emaw, CBI chhui tir tura nawr leh ACB a kalpui tum anih thu an sawi a, heng an thil tih tur reng rengte hi dan chhungah kalpui an tum thu an sawi bawk. 

A thlan dan tur chu hetiang hian an sawi a, paper chunglamah hawrawppuiin, "EIRU NIA RIN THLANNA" tih ziah tur a ni ang a, heng an mi rinte hi anmahni chiang taka hriat anih theihnan an Address emaw, an awmna bul vel chiang taka hriat anih theihna tarlan tur a ni ang a, sorkar hnathawkte chu an thawhna office hming leh address nen ziah tur a ni ang. Eiru nia an rin chhan te, eiruk lai nia rin leh In emaw huan awmna lai leh hriat awlsam theihna tur tarlan tur a ni ang. Heng eiru nia rinte hming ziaktute hi thup tur a ni ang. A thlangtute chuan an hming, Address, nihna, Eiru nia rin chhan/ Eirukna lai nia rin chhan chi hrang hrang ziah tur a ni.

Eiru nia rinte hming ziak thehluhna hmun tur chu, Newslinks Office, Treasury Square, INFORMA (RTI Help Line) Venghlui, FOMTU office Treasury Square leh Aizawl Post Office Chanmary te a ni ang.Thehluh theih hun chhung hi September ni 15, 2009 thleng a ni ang a, hemi ral hnua lehkha lutte te chu pawm a ni dawn lova, heng lehkha lutte hi September ni 16-30, 2009 chhungin enfel a ni ang a, October ni 3, 2009 ah Anti Corruption Convention neih hunah mipui kalkhawmten henga hming lutte chu tha an tih anga kalpui tum anih thu an sawi bawk a ni.